Главная | Обратная связь | Поможем написать вашу работу!
МегаЛекции

О именье долъжоное и о давность земъскую.




 

Тежъ уставуемъ: коли бы хто купилъ якое дедицъство и деръжалъ спокойне, заплативъшы, а на томъ же бы именью хто иншый долгъ мелъ, первей врядовне записаный, поки ещо было не продано, а молъчал бы по продажы о тотъ долгъ три лета и правомъ его не доходилъ, таковый хотя бы и листы упоминалные мелъ, тотъ не маеть на томъ именью того долъгу смотрети, але маеть истъцо[в] въ своихъ пенезяхъ искати. А естли бы тотъ истецъ не мелъ чымъ платити, тогды в том долъгу маеть судъ его самого выдати. Нижли естли бы о тотъ долъгъ, такъже врядовне записаный, до права позвалъ того, который именье тое деръжыть, давности таковой не омешкавъшы, тому подлугъ запису его перъшого тотъ долъгъ на томъ же именью маеть быти прысужонъ. А тотъ, который в деръжаньи будеть того дедичъства, оный долъгъ маеть заплатити тому, хто перъшый записъ маеть, а самъ маеть тыхъ пенезей и кождого иного накладу дойскиватися на истъцу. А естли бы тот истецъ, не заплатившы, умеръ, тогды на маетности его лежачой и рухомой, естли которую заставить, того смотрети маеть. По тому жъ и о презыскахъ, з уряду сказаныхъ, на томъ именьи маеть ся розумети, яко и о долъгохъ, естли бы хто давность таковую от сказанья урядового омешъкалъ.

 

Артыкулъ 11.

О долъги двухъ албо колько на одномъ именью.

Коли бы хто именье закупное в которой суме деръжалъ, а другий бы ся з долъгомъ своимъ ку тому жъ именью приповедалъ, менуючы, ижъ тежъ ему на томъ же именью сума естъ описана або с права была бы сказана, а онъ бы от року, в записе описаного, або от сказанья врядового давности земское десет летъ не замолъчал, а тое бы именье обое сумы стояло, тогды тотъ, который маеть болшую суму, такъ деръжачый, яко и зыскуючый, будеть повиненъ другому меньшую суму заплатити. А пакъли бы платити не хотелъ, тогды тотъ, хто меньшую суму маеть, тому большую суму повиненъ заплатити, або обадва тое именье иньшому в обоей суме заставити и тые пенези межы себе водле записовъ розъделити. А пакъли бы колько долъжниковъ зъ розъными долъги до одного именья збеглися, а именье бы вже за тые долъги не стояло, тогды хто будет мети первъшый слушный и правный записъ и в деръжанью того именья за тым перъшымъ записомъ былъ, а тое бы именье большое сумы не стояло, тогды тотъ за перъшымъ записомъ своимъ при таковомъ именью зостати маеть, а тые з остатъними записы мають пенезей своихъ на истъцу доходить. А где бы истецъ умеръ, тогды на иньшой маетности его.

 

Артыкулъ 12.

 

Каждая застава и долъгъ позычоный давности мети не мають.

Хочемъ тежъ мети и уставуемъ, абы каждая застава и долъгъ позычоный давности земъское не мели. И вольно будеть всякому дедичу, отъложывшы суму пенезей, передъ правомъ за заставу дедичъства своего дойти, такъ за правомъ своимъ прирожонымъ и яко кольвекъ набытымъ. Тым же способомъ всякому стану долъговъ своихъ позычоныхъ за описами водле сего статуту справеными на истъцу и потомъкохъ его доходити вольно будеть, хотя бы и черезъ давность земъскую не упоминалъся.

 

Артыкулъ 13.

 

О способе доводу заставы именья лежачого, кгды бы хто кого ку бранью пенезей позвалъ.

 

Тежъ уставуемъ: если бы хто позвалъ кого о именье албо о люди и о кгрунъты, менуючы, ижъбы от продъка его албо и от него самого было заставлено, а позваный бы до заставы не зналъся, ино если жалоба будеть о таковую заставу, которая бы се стала по выданью к утверъженью сее теперешнее поправы статутовое, тогды врядъ промежъку сторонъ в той речы узнан[ь]е и розъсудокъ свой учынити маеть водлугъ сего статуту, яко о томъ вышей доложоно. Лечъ ижъ многие люди звыкли о речы давные застаралые, менуючы заставу, одинъ другого ку праву потегати и тымъ затрудненье сторонамъ и вряду непотребное задавати, прото и о такихъ давныхъ а прошлыхъ заставах такъ объясняемъ и уставуемъ: ижъ кгды бы хто кого о заставу именья лежачого, людей и кгрунътовъ ку бранью пенезей позвалъ, которую бы заставу менилъ быти вчыненою по выданью тому паньству, великому князьству литовъскому статуту одъ продъка нашого славное памети короля его м[и]л[о]сти Жикгимонъта Перъшого, а позваный бы до тое заставы не зналъся, а естли бы то менилъ быть своею властъностью отчызною, матерыстою албо спадъкомъ и якимъ правомъ набытымъ и пры томъ щытилъся и бралъ собе на помочъ давность земъскую, тогды перъвей тотъ, хто в таковой речы жалуеть, маеть то явне и значъне писмомъ слушнымъ водле права показати. Естли то, о што жалуеть, коли в дому и в продковъ его было, тогды за тымъ и ку дальшому доводу правному, ижъ то з дому его або от него самого заставою вышло, прыпущонъ будеть водле права и арътыкуловъ, о правахъ земъленыхъ описаныхъ, звлаща где бы сторона позваная оборонъ правных на писме не показала, а то се маеть розуметь о именье, люди и кгрунты заставные по выданью першого старого статуту. Пакли жъ бы жалобная сторона напродъ того же тое именье, люди або кгрунты, о што позываеть, было коли в дому его, на писме значне водлугъ статутовъ першихъ не показала, але за жалобою згола до присеги бралася, тогды без того и ку доводу на заставу не маеть быти припущона, але тотъ позваный а держачий того именья, людей и кгрунтовъ, при своемъ давномъ держанью, и надъ давность земъскую естли бы якого права на писме не показалъ, маеть самъ одинъ при давности, же то естъ его властъность, а о заставе жадной не ведаеть, присягнуть. А где бы при давности земъской сторона позваная який колвекъ доводъ листовный показала, тогды и без присеги от объжалованья пры держанью своемъ давномъ волна будетъ. Вед же и то варуемъ, если бы хто в такой речи мелъ до кого право, тогды ачъколвекъ вже порядкомъ сего статуту нового вси речи отправованы будуть. Нижли речи застаралые, предсе старымъ статутомъ, за которого ся што стало, сужоны и сказованы быти мають. А для того, абы се нихто неведомостью не вымовлялъ, кождый таковый, хто бы до кого мелъ якое дело, от выдан[ь]я и уживанья сего статуту будетъ виненъ правомъ своимъ того доходити. А где бы до десети летъ от выданья того статуту о таковую заставу давную молчалъ и правне з нимъ не поступовалъ, тотъ о таковую заставу вечне молчати маетъ, вынемъши толко дети летъ не дорослые, с которыхъ, дошедши летъ своихъ, братъ старший або опекун также до десети летъ о таковую заставу виненъ будетъ правомъ чинити, яко вышей описано. А который бы, дошедшы летъ своихъ, до десети летъ в молчанью был, таковый также вечне о то молчати маетъ. По тому жъ хто бы от уфалы статуту старого, от короля его милости Жыкгимонта Першого в року тисеча пятъсотъ двадцать девятомъ выданого, в такой речи ажъ до выданья сего теперешнего статуту в молчанью былъ, упоминанья не чинилъ и до права не притегал, таковый за такъ далекою давностью также о такую речъ до права потегати и того упоминати не маетъ вечными часы.

 

Артыкулъ 14.

 

Поделиться:





Воспользуйтесь поиском по сайту:



©2015 - 2024 megalektsii.ru Все авторские права принадлежат авторам лекционных материалов. Обратная связь с нами...