 |
Песнь 4-я. Братия: Христос воскресе из мертвых, смертию смерть поправ, и сущим во гробех живот даровав. Яко единолетный агнец, благословенный нам венец Христос, волею за всех заклан бысть, Пасха чистительная, и паки из гроба красное правды нам возсия Солн
|
|
|
|
Песнь 4-я.
Ирмос:
На божественней стражи, богоглаголивый Аввакум да станет с нами, и покажет светоносна ангела, ясно глаголюща: днесь спасение миру, яко воскресе Христос, яко всесилен.
Братия:
Христос воскресе из мертвых, смертию смерть поправ, и сущим во гробех живот даровав.
Мужеский убо пол, яко разверзый девственную утробу, явися Христос: яко человек же, Агнец наречеся: непорочен же, яко невкусен скверны, наша Пасха, и яко Бог истинен совершен речеся.
Братия:
Христос воскресе из мертвых, смертию смерть поправ, и сущим во гробех живот даровав.
Яко единолетный агнец, благословенный нам венец Христос, волею за всех заклан бысть, Пасха чистительная, и паки из гроба красное правды нам возсия Солнце.
Братия:
Христос воскресе из мертвых, смертию смерть поправ, и сущим во гробех живот даровав.
Богоотец убо Давид пред сенным ковчегом скакаше играя, людие же Божии святии, образов сбытие зряще, веселимся божественне, яко воскресе Христос, яко всесилен.
Богородичны (в первый день Пасхи не поются, а поются со второго дня святой Пасхи и до дня отдания в среду перед Вознесением):
Создавый Адама, Твоего праотца, Чистая, зиждется от Тебе, и смертное жилище разори Своею смертию днесь, и озари вся божественными блистаньми воскресения.
Егоже родила еси Христа, прекрасно из мертвых возсиявша, Чистая, зрящи, добрая и непорочная в женах и красная, днесь во спасение всех, со апостолы радующися, Того прославляй.
Катавасия (повторяем первый Ирмос):
На божественней стражи, богоглаголивый Аввакум да станет с нами, и покажет светоносна ангела, ясно глаголюща: днесь спасение миру, яко воскресе Христос, яко всесилен.
Братия:
Христос воскресе из мертвых, смертию смерть поправ, и сущим во гробех живот даровав.
(Трижды)
|
|
|
Старший может кадить мирянским кадилом и возглашает:
Христос воскресе!
на что братия отвечают всякий раз:
Воистину воскресе!
(Трижды):
Песнь 5-я.
Ирмос:
Утренюем утреннюю глубоку, и вместо мира песнь принесем Владыце, и Христа узрим, Правды Солнце, всем жизнь возсияюща.
Братия:
Христос воскресе из мертвых, смертию смерть поправ, и сущим во гробех живот даровав.
Безмерное Твое благоутробие, адовыми узами содержимии зряще, к свету идяху, Христе, веселыми ногами, Пасху хваляще вечную.
Братия:
Христос воскресе из мертвых, смертию смерть поправ, и сущим во гробех живот даровав.
Приступим, свещеноснии, исходящу Христу из гроба яко Жениху, и спразднуим любопразднственными чинми Пасху Божию спасительную.
Богородичны (в первый день Пасхи не поются, а поются со второго дня святой Пасхи и до дня отдания в среду перед Вознесением):
Просвещается божественными лучами и живоносными воскресения Сына Твоего, Богомати Пречистая, и радости исполняется благочестивых собрание.
Не разверзл еси врата девства в воплощении, гроба не разрушил еси печатей, Царю создания, отонудуже воскресшаго Тя зрящи, Мати радовашеся.
Катавасия (повторяем первый Ирмос):
Утренюем утреннюю глубоку, и вместо мира песнь принесем Владыце, и Христа узрим, Правды Солнце, всем жизнь возсияюща.
Братия:
Христос воскресе из мертвых, смертию смерть поправ, и сущим во гробех живот даровав.
(Трижды)
Старший может кадить мирянским кадилом и возглашает:
Христос воскресе!
на что братия отвечают всякий раз:
Воистину воскресе!
(Трижды):
Песнь 6-я.
Ирмос:
Снизшел еси в преисподняя земли и сокрушил еси вереи вечныя, содержащия связанныя, Христе, и тридневен, яко от кита Иона, воскресл еси от гроба.
Братия:
Христос воскресе из мертвых, смертию смерть поправ, и сущим во гробех живот даровав.
|
|
|
Сохранив цела знамения, Христе, воскресл еси от гроба, ключи Девы невредивый в рождестве Твоем, и отверзл еси нам райския двери.
Братия:
Христос воскресе из мертвых, смертию смерть поправ, и сущим во гробех живот даровав.
Спасе мой, живое же и нежертвенное заколение, яко Бог Сам Себе волею привед Отцу, совоскресил еси всероднаго Адама, воскрес от гроба.
Богородичны (в первый день Пасхи не поются, а поются со второго дня святой Пасхи и до дня отдания в среду перед Вознесением):
Возведеся древле держимое смертию и тлением, Воплотившимся от Твоего пречистаго чрева, к нетленней и присносущней жизни, Богородице Дево.
Сниде в преисподняя земли, в ложесна Твоя, Чистая, Сшедый, и Вселивыйся и Воплотивыйся паче ума, и воздвиже с Собою Адама, воскрес от гроба.
Катавасия (повторяем первый Ирмос):
Снизшел еси в преисподняя земли и сокрушил еси вереи вечныя, содержащия связанныя, Христе, и тридневен, яко от кита Иона, воскресл еси от гроба.
Братия:
Христос воскресе из мертвых, смертию смерть поправ, и сущим во гробех живот даровав.
(Трижды)
Старший может кадить мирянским кадилом и возглашает:
Христос воскресе!
на что братия отвечают всякий раз:
Воистину воскресе!
(Трижды):
Старший, чтец или братия: Кондак, глас 8:
Аще и во гроб снизшел еси, Безсмертне, но адову разрушил еси силу, и воскресл еси яко победитель, Христе Боже, женам мироносицам вещавый: радуйтеся, и Твоим апостолом мир даруяй, падшим подаяй воскресение.
Икос:
Еже прежде солнца, Солнце зашедшее иногда во гроб, предвариша ко утру, ищущия яко дне мироносицы девы, и друга ко друзей вопияху: о другини! приидите, вонями помажем тело живоносное и погребенное, плоть воскресившаго падшаго Адама, лежащую во гробе. Идем, потщимся якоже волсви и поклонимся, и принесем мира яко дары, не в пеленах, но в плащанице Обвитому, и плачим, и возопиим: о Владыко, востани, падшим подаяй воскресение.
Все поют:
Воскресение Христово видевше, поклонимся Святому Господу Иисусу, Единому безгрешному. Кресту Твоему покланяемся, Христе, и святое воскресение Твое поем и славим: Ты бо еси Бог наш, разве Тебе иного не знаем, имя Твое именуем. Приидите вси вернии, поклонимся святому Христову воскресению: се бо прииде Крестом радость всему миру. Всегда благословяще Господа, поем воскресение Его: распятие бо претерпев, смертию смерть разруши.
(Трижды)
Воскрес Иисус от гроба, якоже прорече, даде нам живот вечный, и велию милость.
(Трижды)
|
|
|
