 |
Евангелие от Матфея, зачало 98.
|
|
|
|
Служба благодарственная Богу, в Троице Святой славимому, о великой Богом дарованной победе народу нашему в Великой Отечественной войне
НА МАЛОЙ ВЕЧЕРНИ
Стихиры, глас 1:
Трисвятыми песньми/ непрестанно от Ангелов хвалимый,/ восприими и от нас, бренных, трисвятую песнь, Победителю Боже,/ бренными и скверными усты вопиющих:/ Святый Боже, грешников помиловавый, / Святый Крепкий, сильных гордыню сокрушивый,/ Святый Безсмертный, врагов наших умертвивый,/ нас же от смерти сохранивый,/ Троице Святая, Боже наш, слава Тебе.
Что Ти принесем,/ благ наших не требующий Боже,/ яко явился еси нам с щедротами Твоими,/ от века неслышанными?/ Несть что ино,/ кроме от сосуда Твоего избранного уготованную песнь сию:/ Богу благодарение,/ давшему нам победу Господем нашим Иисус Христом/ и исходящим от Отца Всесвятым Духом.
Падоша крепцыи силою Твоею, Всесильный Боже,/ но нуждою падоша пред Тобою/ и не возмогут стати./ Мы же, Твоею милостию стояще прости,/ волею Твоему величеству припадаем, вопиюще:/ вознесый рог Церкви Христа Твоего и всех православных,/ сломивый же рог новых язычников германских (готфских, немецких [1]),/ Боже наш, слава Тебе.
Кто по достоянию / воспети может милости Твоя, Господи,/ явльшияся нам ныне,/ не токмо от человек, но ниже от Ангел?/ Ты бо болий еси всея хвалы,/ и ни едино же слово довольно к похвалению дел Твоих. /Сам убо, йже научил еси руце мой на ополчение,/ и устне отверзи,/ да, якоже возможно человеком,/ возвестят хвалу Твою.
Слава, и ныне, глас 8:
Слава Тебе, Предвечный Отче,/ сих, иже не суть достойни нарещися сыны Твоя,/ возлюбивый и прославивый;/ слава Тебе, Сыне Единородный,/ рабов Твоих, аки сынов, от пагубы искупивый;/ слава Тебе, Душе Пресвятый,/ вся во всех благодатию Своею содеявший и действующий./ Троице Святая, Боже наш, слава Тебе.
|
|
|
На стиховне стихиры, глас 2.
Подобен: Доме Евфрафов:
Торжественными ветвьми/ преукрашенна,/ новый Сионе, Отчизна наша,/ благодарственная воспой Богу,/ победившему супостаты твоя.
Стих: Услышите сия, вси языцы,/ внушите вси живущий по вселенней.
Стени, враже православия,/ се бо тя, вознесенна,/ покори Бог/ под нозе/ боящимся Его.
Стих: Господи, Господь наш,/ яко чудно Имя Твое по всей земли.
Вси окрестнии народи,/ хотящий брани,/ вострепещите, видяще,/ яко Бог/ поборствует по нас.
Слава, и ныне, глас тойже:
Всяк православный/ да воспоет дивное Божие смотрение,/ устроившее верным славу,/ новым язычником же германским (готфским, немецким) / студ и пагубу.
Тропарь зри на велицей вечерни.
НА ВЕЛИЦЕЙ ВЕЧЕРНИ
На Господи, воззвах: стихиры, глас 6:
Тебе, Триипостасному,/ победительную песнь Церковь наша возсылает,/ Отцу, всемогуществом вражию сокрушившему силу,/ Сыну, премудростию расточившему лукавых советы,/ Духу Святому Параклиту, нас в скорбех утешившему,/ сердцем и устнами вопиющи:/ Свят еси, Отче Всемогущий,/ Свят еси, Сыне, Божия Премудросте,/ Свят еси Душе, Благодать неистощимая,/ Боже наш, слава Тебе.
Воспойте, православнии народи,/ Победителю Богу песнь нову,/ содеявшему чудо новейшее всех древних чудес:/ сильныя бо сокруши во брани,/ немощныя же препояса силою свыше/ и вознесе смиренныя./ Тому победительная возсылаем/ и, припадающе, вопием:/ Боже наш, слава Тебе.
Поим Господеви,/ и ныне бо славно прославися, / ничимже меньше от прежних:/ Иже бо древле гордаго фараона погрузи в Чермнем мори,/ Сей и ныне равнаго фараону/ гордостию и суровостью в чермнем крове/ воев его потопи мори сопротивнаго./ Мы же, прешедше по суху посреде сего моря,/ поем Господеви:/ славно бо прославися.
Сказал еси, Господи, делом и словом,/ чесо ради древле вознесл еси лютаго на люди Твоя фараона;/ познахом и ныне от страннаго дела Твоего,/ чесо ради воздвигл еси востающия на ны,/ яко да вознесении богоборцы смирятся падением,/ Твое же чудное Имя вознесется превыши небес/ Непостижиме в делех Твоих, Боже,/ слава милосердию Твоему.
|
|
|
Благословен еси, Господи Боже наш,/ научивый руце наши на ополчение,/ персты наша на брань:/ Твоею бо Ипостасною Мудростию невежество наше/ на хитрость вражию умудрися,/ Твоею силою немощь наша на гордосильнаго укрепися,/ Твоею благодатию множество грехов отступничества нашего покрыся/ и ярость волчья сокрушися./ Вся ведый, вся могий,/ вся беззакония рабов Твоих презираяй,/ Боже наш, слава Тебе.
Боже, песнь нову воспеваем Тебе,/ дающему спасение людем,/ избавляющему Отчизну нашу, якоже Древний Израиль Свой,/ от погибели лютой./ Ты послал руку Твою с высоты/ и избавил еси нас от вод многих,/ от рук сынов антихристовых,/ ихже храбрость ублажиша и убояшася мнози;/ но нам, на Тя надеющимся,/ а не на свою силу уже уповающим, споборствуяй,/ явственно показал еси,/ яко сии токмо людие блажени суть,/ имже Господь Бог их.
Слава, глас 1:
Кто возглаголет силы Твоя, Господи?/ Слышаны сотворит вся хвалы Твоя?/ Ты бо и ныне смирил еси яко язвена гордаго,/ мышцею силы Твоея разгнал еси враги Твоя,/ нам же, безчисленнаго ради милосердия Твоего,/ не по беззаконием нашим сотворил еси,/ но якоже щедрит отец сыны,/ ущедрил еси блудных сынов покаявшихся Тебе./ Исповедят Небеса чудеса Твоя, Господи,/ и земля истину Твою в Церквах святых. / Мы же воспоем милости Твоя:/ исповемыся Тебе, Господи,/ яко Благ еси, яко во веки милость Твоя.
И ныне, Богородичен: Всемирную славу:
Левитских книг чтение (глава 26):
Глагола Господь сыном Израилевым, глаголя:/ аще в повелениих Моих ходите,/ и заповеди Моя сохраните, и сотворите я./ И дам вам дождь во время его,/ и земля даст рождения своя, и древа польная отдадят плод свой./ И постигнет вас млачение, обрание вина, и вина обрание постигнет сеятву,/ и снесте хлеб ваш в сытость, и вселитеся с твердостию на земли вашей./ И дам мир в земли вашей, и успнете,/ и не будет вас устрашаяй./ И погублю звери лютыя от земли вашея,/ и брань не пройдет сквозе землю вашу./ И поженете враги ваша, и падут пред вами убиени./ И поженете пять из вас сто, и сто вас поженете тьмы:/ и падут врази ваши пред вами мечем./ И призрю на вы, и возблагословлю вы,/ и возвращу вы, и умножу вы,/ и положу завет Мой с вами./ И снесте ветхая, и ветхая ветхих,/ и ветхая от лица новых изнесете./ И положу завет Мой в вас,/ и не возгнушается душа Моя вами./ И похожду в вас, и буду вам Бог,/ и вы будете Мне людие./ Аще же не послушаете Мене, ниже сотворите повелений Моих сих,/ но ни покоритеся им,/ и судеб Моих вознегодует душа ваша,/ якоже вам не творити всех заповедей Моих,/ и яко разорити завет Мой./ И Аз сотворю сице вам:/ наведу на вы скудость, и сеете вотще семена ваша,/ и изъядят труды ваша противнии ваши,/ и поставлю лице Мое на вы, и падете пред враги вашими:/ и поженут вы ненавидящии вас,/ и побегнете никомуже, гонящу вас./ И сокрушу досаждение гордыни вашея,/ и положу небо вам, яко железно,/ и землю вашу, яко медяну./ И будет вотще крепость ваша,/ и земля ваша не даст семене своего,/ и древа сельная не дадят плода своего./ И послю на вы звери дивия земныя, и поядят вас и потребят скоты ваша,/ и умалены сотворю вы, и погубит вы находяй меч./ И будет земля ваша пуста, и двори ваши будут пусты,/яко вы ходисте ко Мне страною,/ и Аз пойду к вам в ярости страною –/ глаголет Господь Бог, Святый Израилев.
|
|
|
Пророчества Исаиина чтение (главы 61 и 62):
Да возрадуется душа моя о Господе,/ облече бо мя в ризу спасения/ и одеждею веселия одея мя:/ яко жениху, возложи мне венец/ и, яко невесту, украси мя красотою./ И яко земля, растящая цвет свой,/ и яко вертоград семена своя прозябает,/ тако возсияет Господь правду и радость пред всеми языки./ Сиона ради не умолкну и Иерусалима ради не попущу,/ дондеже убо изыдет, яко свет, правда моя,/ спасение же мое, яко свеща, разжжется./ И узрят языцы правду твою, и вси царие земстии славу твою,/ и нарекутся именем твоим новым, еже Господь именует е./ И будеши венец доброты в руце Господни/ и диадима царствия в руце Бога твоего./ И ктому не наречешися оставлен,/ и земля твоя ктому не наречется пуста./ Тебе бо наречется воля моя,/ и земля твоя вселенная,/ яко благоволит Господь в тебе, и земля твоя населится./ И яко живый юноша с девою, тако поживут сынове твои с тобою./ И будет,имже образом возвеселится жених о невесте,/ тако возвеселится Господь о тебе.
|
|
|
Пророчества Софониева чтение (глава 3):
Тако глаголет Господь:/ радуйся зело, дщи Сионова, / проповедуй, дщи Иерусалимова,/ веселися и красуйся от всего сердца твоего, дщи Иерусалимова./ Отъят Господь неправды твоя,/ избавил тя есть из руки враг твоих,/ воцарится Господь посреде тебе, и не узриши зла ктому./ Во время оно речет Господь Иерусалиму:/ дерзай, Сионе, да не ослабеют руце твои./ Господь Бог твой в тебе силен спасти тя,/ наведет на тя веселие, и обновит тя в возлюблении Своем,/ и возвеселится о тебе в красоте, яко в день праздника. / И соберет сокрушенныя./ Горе, кто прият нань поношение?/ Се Аз творю в тебе Мене ради, глаголет Господь,/ во время оно спасу сотренную,/ и отриновенную восприиму,/ и положу их в похвалу/ и имениты по всей земли.
На литии стихиры, глас 1:
Господа сил, давшаго нам крепость,/ днесь, людие, прославим:/ Сей бо Бог наш,/ и не вменится ин к Нему,/ Сей подъят нас и не возвеличи укорившия ны./ Бог сый мира, Отец щедрот,/ благослови достояние Свое миром./ Сей Царь царствующих,/ Моисеем сохранивши люди израильтеския/ и ныне всесильною десницею избавивый от бед Отечество наше,/ Тому всегда славу и честь принесем.
Приидите, окрестнии народи,/ и видите дела Божия,/ яже сотвори во днех и во странах наших:/ егоже врага убоястеся и ублажисте, облия студом;/ на негоже крепко уповаете,/ яко стена преклонена/ и оплот возриновен разорися,/ и, егоже непобедима быти глаголасте,/ паде, яко един от человек./ Мы же, силою Вышняго непобедими устояше,/ честно и славно, купно же и благодарно,/ воспеваем Богу песнь победную.
Глас 4: Исказитель Креста Святаго, предтеча антихристов/ и Божественных святынь поругатель/ силою Креста Святаго побежден есть и сокрушен/ и, надеяся на силу бесовскую/ ихже помощь сатанинскую чрез волхвов призывая/ к ненавистником имене Христова себе причте и во ад сниде,/ Святая же Церковь Православная,/ печальнице земли нашея,/ победительную песнь Богу воспевающи,/ да благоденствует во веки в мире.
Возвеселишася Небеса и вси, живущии на них,/ падшу змию и аггелом его / во брани с Михаилом;/ возвеселися и ты, земле,/ яко паде змий германский (готфский, немецкий), борющийся с нами./ Ныне спасение и сила и область Христа Господня:/ низложен бо есть клеветник братии нашея/ и уничижен уничижаяй нас.
Связан апостола Петра молитвою, Симон-волхв летающий/ люте паде от воздуха, и телом разбися,/ и, иже криле восприят, в посмеяние живота лишися./ Такожде и Церкви Православныя молитвами/ и народа нашего трудами/ германский (готфский, немецкий) Симон, мняйся от гордыни не по земли ходити,/ загнан в нырище свое и иудову кончину воспиял./ Мы же, сие дело Божие видети сподоблыпиися, согласно возопием:/ Боже, гордаго смиривый, а смиреннаго возвысивый,/ слава смотрению Твоему.
|
|
|
Слава, и ныне, глас 6:
Радуйся, святостью сияющая Церковь Православная,/ Богом насажденная в стране нашея,/ радуйтеся, военачальницы и великодушнии воини в брани прославленныя/ и вси благочестивых составы:/ порази Бог врагов и супостат твоих/ и возвеличи Свое Царство,/ в тишину и веселие христианскому роду/ и спасение всем людем.
На стиховне стихиры, глас 5:
Приидите, вернии,/ возрадуемся Господеви со страхом и радостию,/ победительныя ветви, иже дарова нам,/ под ногу Его подстилающе,/ со страхом Божия ради величества,/ и лютаго, аще и не скораго, на нечестивых отмщения,/ с радостию же, неизглаголаннаго милосердия ради,/ имже презрев беззакония наша,/ толикая недостойным дарова нам.
Стих: Услышите сия, вси языцы,/ внушите, вси, живущии по вселенней.
Иже древле посла Ангела Своего / и поби полки ассирийския,/ Сей и ныне Господь сил не стерпе наругания германского (готфского, немецкого)/ на Отчизну нашу,/ посла Ангела Своего, иже ополчися окрест боящихся Его,/ и разгна вся полки противных,/ православным же людием/ спасение и безсмертную славу содела.
Стих: Господи, Господь наш,/ яко чудно Имя Твое по всей земли.
Якоже людие израильтестии/ увидевше великую руку Господню на египтянов,/ тако и мы ныне, увидевше,/ колика содела германцам (готфам, немцам), врагом нашим,/ веселимся, и веруем Тебе, Господи, и угодником Твоим,/ и, с трепетом припадающе, вопием:/ страшен и дивен еси, Господи,/ не токмо наказующий, но и милующий человеков.
Слава, и ныне, глас 8:
Видесте и вы, германстии (готфские, немецкие) военачальницы и силы,/ стольный град Отечества нашего,/ но не якоже хотесте,/ но яко Бог изволи:/ видесте, преклонени долу, побеждени ведоми,/ якоже подобает пленником./ Радуйся обаче в себе, язык варварский, обретше милостиваго победителя,/ о немже роди православных благоговейно вопиют:/ Господи Саваофе, помилуй помиловавшаго и врагов своих/ и утверди его державу/ во век века ненаветну.
Тропарь, глас 8:
Препрославлен еси, Господи Боже наш,/ даровавый крепость на враги Отечеству нашему,/якоже Давиду на прегордаго Голиафа,/ осенил еси над главою его в день брани,/ препоясал еси немощныя силою свыше/ и теми всю дерзость вражию низложил еси./ Многомилостиве, слава Тебе.
НА УТРЕНИ
На Бог Господь: тропарь трижды: Препрославлен еси, Господи:
По 1-м стихословии седален, глас 7:
Праздновати уставихом нарочитый день сей Тебе, Милостиве Господи,/ воньже возвеселил еси нас о вразех наших,/ яко да познает род ин, сынове родящиися,/ и востанут, и поведят я сыновом своим:/ яко да положат на Бога упование, и не забудут дел Божиих,/ и заповеди Его взыщут, и с нами прославят от рода в род / Тя, зело прославльшагося в нас.
Слава, и ныне, глас тойже:
О, крайняго неистовства и злобы!/ Обрелися ныне последующии зле предыдущему Иуде,/ обрелися новые иуды, рабы и льстецы,/ обрелися сыны погибельныя, диаволы нравом, а не человецы,/ треклятые отступники наши,/ иже оставив Отчизну свою,/ и прилепилися к супостату, совещая воздати злая единокровным своим,/ преложили в себе милость на корысть, любовь на ненависть,/ Бог же воздаде отступникам нашим, якоже и Иуде, по делом их.
По 2-м стихословии седален, глас 8:
Равно древнему столпотворению,/ высокоумное врагов наших здание подобное прият разорение:/ сниде бо Бог видети дело их и смеси языки им,/ яко не слышати друг друга своего,/ ни воинству начальников гласу внимати,/ и разсыпа их по лицу земли живых, мертвых же прияша преисподняя земли,/ и дело их в прах разсыпася./ Мы же в зданиях храмов Божиих Отечества нашего воспоем велегласно:/ слава снизхождению и смотрению Твоему, едине Человеколюбче.
Слава, и ныне, глас 4:
Тебе подобает песнь, Боже, в Отечестве нашем,/ Тебе да воздастся молитва по всей земли благодарственная,/ Иже начен с нами и соверши дело, удивления и благодарствия достойное:/ пред окрестными народы славою и честию венчал еси нас/ и внутренния преславно посрами богоборцы,/ да видят и разумеют вси, яко есть Защитник наш, по нам поборствуяй.
По полиелеи припев:
Величаем Тя,/ Триипостасне Владыко,/ всемилостивно на нас, рабов Твоих, призревшаго/ и на Тя уповающим/ победу даровавшаго.
Псалом избранный: Суди, Господи, обидящия мя: Зри на Воздвижение Честнаго Креста.
Седален, глас 4:
Дух Святый тя, Церкве Святая, настави Отечество наше паствити на пажитех спасительных,/ и Христос светильника тя показа яве./ Сего ради ликуй и веселися со дерзновением,/ яко сугубыя венцы от Венцедавца приим.
Слава, и ныне, тойже.
Степенна, 1-й антифон 4-го гласа. Прокимен, глас 4: Буди, Господи, милость Твоя на нас,/ якоже уповахом на Тя. Или: Господь Сил с нами, заступник наш, Бог Иаковль. Стих: Господь разоряяй советы языков и отметаяй мысли людей. Или: Бог нам прибежище и сила, Помощник в скорбех, обретших ны зело. Всякое дыхание:
Евангелие от Матфея, зачало 98.
Рече Господь Своим учеником: услышати имате брани и слышания бранем. Зрите, не ужасайтеся, подобаетъ бо всем сим быти, но не тогда есть кончина. Востанет бо язык на язык и царство на царство, и будутъ глади и пагубы, и тpуси по местом. Вся же сия начало болезнем. Будет бо тогда скорбь велия, якова же несть была от начала мира доселе, ниже имать быти. И аще не быша прекратилися дние оны, не бы убо спаслася всяка плоть. Избранных же ради прекратятся дние оны.
По 50-м псалме стихира, глас 6:
Восхвалим днесь согласныя Святаго Духа органы,/ Богом собранный лик апостольский,/ не подражавший Иуде предателю,/ но верою и любовию даже до смерти послуживший своему Учителю./ О блаженнии овцы, слушающии пастыря,/ блазии раби и вернии,/ повинующиися Господу своему,/ достойно внидосте в радость Господа своего,/ достойно сядете на двунадесятих престолех,/ судяще дванадесяте коленома Израилевома!/ Блажени и вам подражающии верою и любовию к своим наставником,/ чада отцем, раби владыкам послушливии!/ Да восхвалятся ныне с вами земнии Ангели,/ не прилепившиися диаволу крамольнику,/ да почтутся, якоже апостоли,/ не согласившиися с новыми иудами/ но души предавшии за свое Отечество./ Возвеселитеся ныне, плачущим отступником,/ взыграйте, стенящим и рыдающим супостатом:/ достойни есте за верность и послушание/ приятия чести и венцев Небесных.
|
|
|
