Собор Московских святых. Служба

СЛУЖБА СОБОРУ МОСКОВСКИХ СВЯТЫХ
На Господи воззвах:
гл.8 под «О преславного чудесе..»
О преславнаго чудесе,/ яко звезды светлыя/ на церковном небеси сияете/ и искушений и печалей мрак разгоняете,/ ко граду небесному/ путеводяще овцы паствы вашея,/ о святии чудотворцы/-святителие Московстии,/ не престайте во вся времена/ Христа умоляюще/ за град же и люди// благодарным сердцем вас славящия!
О боголюбиваго подвига/ отец преподобных,/ ихже сонм великий/ в пределех Московских просия!/ Молитвами бо и бдением,/ нестяжанием и крайним смирением/ Богу угодивше,/ дерзновение прияша/ молитися за вся чада своя духовная,/ тем же молим не престати николиже// яже за ны молитвам вашим.
О благочестиваго мудрования праведников,/ о дивнаго юродства во Христе блаженных,/ заповеди Христовы всем сердцем возлюбивших/ и самоотверженно исполнивших! / Восхвалим убо вернии/ и поклонимся им,/ во след их шествовати потщимся,/ моляще непрестанно,// молитвами их спастися душам нашим.
О велия веры дерзновения,/ еже во испытаниих явиша новомученицы,/ тии бо яко в чуждих телесех страждущии,/ и многообразно/ смерть за Христа претерпевающии,/ духом к Отцу Небесному возлетеша,/ и граду нашему/ твердое забрало быша/ всем же людем его/ молитвенницы теплии// и заступницы неусыпнии показашася.
Слава, гл.8:
Радуйся и веселися о Господе,/ граде великий Москво,/ яко мног плод Христу приносиши—/ всех святых в пределех твоих просиявших/ и Ему добродетельным житием благоугодивших// и имя Его по всей Руси прославивших.
На литии:
Глас 5, под Радуйся:
Приидите, Небеснии предстателие наши, к нам,/ вашего чающым милостивнаго посещения,/ и избавите озлобленныя мучительскими прещении/ лютаго неистовства неверных,/ от нихже, яко пленницы и нази, гоними есмы,/ от места на место часто преходяще/ и заблуждающе в вертепех и горах./ Ущедрите убо, прехвальнии,/ и даруйте нам ослабу,/ утолите бурю/ и угасите еже на ны негодование,/ Бога моляще,/ подающаго вами Земли нашей велию милость.
Глас 2, под Егда от древа:
Светите граду нашему всегда,/ славнии чудотворцы Московстии,/ якоже звезды светлыя,/ и избавляете нашествия иноплеменных,/ и междоусобныя брани,/ и лютаго неистовства неверных,/ тем же радостно празднуем/ летнюю вашу память,// вас Прославльшаго величающе.
Слава гл.1:
Приидите, вси благочестия рачителие/ и угодник Божиих подражателие/ днесь бо Собор святых Московских прославляется,/ и вси людие Российстии радуются/ о преславных величиих Бога нашего,/ в добродетелех подвижников являемых:/ святителей и иереев,/ преподобных и праведных,/благоверных Царей, Князей и Княгинь,/Христа ради юродивых,/ и предивнаго новаго сонма,/ от безбожник пострадавших мученик,/ихже молитвами, Христе,/ первопрестольный град Москву/ и всю землю Русскую/ утверди во благочестии,/ от навет безбожных враг защити// и спаси души наша.
И ныне гл.2, под. Егда от древа:
Всех скорбящих радосте/ и обидимых покровительнице/ и граду нашему заступнице,/ Премилостивая Владычице,/ не премолчи вопия о нас ко Господу,/ Сыну и Богу Твоему,/ не престай о людех Твоих милосердующи,/ покрывати и спасати// и весело избавляти скорбей рабы Твоя.

Тропарь гл.4
Днесь пророчество святителя Петра/ пред очами нашими сбывается,/ сердце бо России град Москва/ свыше славу велию приемлет,/ украшаемь, яко бисером честным,/ многим сонмом Божиих угодников;/ к нимже мы любовию возопиим:/ о, пречуднии святителие,/ исповедницы и мученицы новии,/ благовернии князие, преподобнии отцы,/ и премудрии юродивии,/ и вси святии, знаемии и незнаемии,/ яко благочестия столпи,/ молите Христа Бога/ стране нашей в мире спастися
КАНОН:
Песнь 1
Приидите, братие, восхвалим и песненныя дары принесем всем святым в земле Московстей просиявшим, и, подвиги и труды их почитающе, ко Христу возопиим: о, Владыко, подаждь нам слово, во еже достойно тех прославити.
Како воспоим подвижники преподобныя, иже на месте сем прежде всех всельшияся и молитвами непрестанными град наш основавшия и благодать Божию неотступну быти месту сему испросившия?
Первии мученицы во Орде вы явистеся, благоверне княже Михаиле с верным ти болярином Феодором, мучением вашим веру Христианскую утвердившии и нечестие языческое посрамившии, и мощи ваша честныя граду нашему яко залог милости Божия даровавшии.
Первоначальника и устроителя града Москвы, блаженне княже Данииле, показа тя Господь, к Нему же непрестанно моляся, град твой и обитель охраняй, землю нашу от бед спасай, православныя же русския люди посещати милостивно не престай.
Вельми радуется о тебе, пречестный отче святителю Петре собственный град Твой Москва, помощника и заступника имея тя: и ныне, владыко, не отходи духом от нас, молитву творя за ны к Богу, яко да избавит ны от насилия безбожных врагов наших, да тя всегда величаем.
Богородичен: Яко благодатное сокровище даровала еси святей Руси икону Твою Владимирскую, еюже отцем нашим многочастне и многообразне благодеяла еси. Не оскудей и ныне, о Мати Божия, утоляющи лютое на нас восстание, и землю Русскую спаси.
Песнь 3
Молим вас, святителие Христовы Феогносте и Киприане, Ионо и Фотие, Симоне и Макарие и вси прочии Московстии чудотворцы: душевное смущение и печали нашея бурю разорите и тишину нам подайте вашими к Богу молитвами.
Святителю отче Алексие, воистину пастырь добрый стаду твоему явился еси, богоразумным рассуждением Церковь и страну нашу окормляя и управляя, ихже пользы ради дары учительства и чудес от Христа приемь, царицу агарянскую исцеляеши и вся люди ко истинней вере наствляеши.
О, премудрыя и боголюбивыя жены преподобныя, Иулиание и Евпраксие, Жениха Христа всем сердцем возлюбившия, обитель иноческую в славном граде Москве яко свещу Ему возжегше, общаго жития женскаго начальницы на Руси явистеся, и ныне, якоже прежде, молите Его прилежно за вся люди града и страны нашея.
Радуется славный град Москва, и веселия исполняется вся Россия, на твоя молитвы надеющеся, Сергие Богоблаженне, обитель же твоя красуется, хранящи честныя твоя мощи, яко сокровище священное.
Песньми священными восхвалим преподобнаго Никона, послушания рачителя, с нимже воспоим Михея, Сергиева сотаинника, Савву и Стефана, Романа и Мефодия, Андроника, Савву и Александра и вся преподобныя ученики и собеседники великаго Сергия, ихже молитвами сынове российстии спасаются.
Богородичен: Красуйся, страно Российская, радуйся и веселися, граде Москво, се бо святая и чудотворная Богоматере икона от Донских предел чудес зарями возсия и бысть нам во спасение от нашествия иноплеменных и иных враг, видимых и невидимых, и от всякия напасти.
Песнь 4
Посхвалим ныне, братие, супруги святыя: благовернаго князя Димитрия, иже на поле Куликове Русь от ига агарян безбожных свободи, и Евдокию, тайную подвижницу и о людех московских усердную попечительницу.
О воини святии, Александре Пересвете и Андрее Ослябе, любовь таковую стяжавшии, яко и души своя за други положившии, и ныне помозите на враги воинству нашему и град ваш от всякаго зла защитите.
Ублажаем тя, отче преподобне Кирилле, яко гласом от иконы Богоматере водимь, обитель, иже на Симонове, оставил еси и в дальний край Отечества нашего отшед, лавру новую тамо соградил еси, обаче духом любве твоея от нас не отступаеши и присно милостивно посещаеши.
Красуются ныне церкви русстии иконами вашими, святии Андрее и Данииле, и вси иконницы дивнии, иже Богомыслием, постом и молитвами Христу Богу угодивше и Боговидения дара сподобльшеся, видения своя вапы изобразиша и образ писания шаровнаго нам оставиша.
О, предивне отче Иосифе, ты от всех обителей русских, яко пчела трудолюбная, мед учений преподобных отец собрал еси, и обитель в пределех Волока Ламскаго устроил еси, и в ней множества иноков славити Господа и ближним служити собрал еси. Тем же и ны, чада твоя, преподобных сродников наших стопами ходити управи.
Богородичен: О, Богомати, Путеводительнице в земном странствии нашем, во имя Твое преподобная мать наша Елена обитель дивную созда, в нейже и доныне лицы монашестии и вси людие благоговеюще Тебе покланяются и милость неоскудную от честныя иконы Твоея приемлют.

Песнь 5
Воспети кий язык возможет по достоянию твоя, предивный отче Максиме, исправления, высокое учительство, в темнице и во узах мученическое страдание и долготерпение.
Блажен еси, святителю отче Макарие, яко мудростию твоею царя грознаго нрав на кротость изменил еси, великия же Соборы церковныя созвал еси, имиже нечестие еретическое упразднися и новым чудотворцем русским празднование утвердися, со онеми же ныне в радость Господа твоего вшел еси.
Радуйся, священноисповедниче Филиппе, нравы и житием подобниче Златоустому, заповедей Господних твердый исполнителю и ревностный неправды обличителю, Бога паче грознаго царя убоявыйся и люди паствы твоея до конца возлюбивый, яко и душу твою за ня положил еси.
О премудрии и блаженнии Василие, Максиме и Иоанне Московстии, чуднии житием и разумом, молим вас прилежно: молите Христа Бога нашего за земное отечество ваше и всем верным спасение испросите.
Яко от младенства лишен еси земнаго царства, благородне Димитрие, и в того место в небесное преселився, тамо сподобился еси небесная благая видети: и ныне ясно зриши Святую Троицу и молишися о державе твоих сродников и за вся верныя люди, во еже бы им получити вся благая и полезная.
Богородичен: Заступницу усердную похвалим и честному Ея поклонимся образу, имже в новопросвещенней стране правоверие утверди и в годину лютую матерь русских градов спасе. Сей и града святаго Петра великое сокровище и всея земли нашея преславное богатство.
Песнь 6
Времени смутному грядущу, Промыслом Вышняго во утверждение Церкви и Отечества нашего патриаршество на Руси явися; ты же, Первосвятителю Иове, на престол сей Богом возведеся, и по имени твоему вся находящая претерпевая, глумления и изгнание от еретиков приял еси, обаче непрестанною молитвою Бога умолил еси, да не погибнет Русь Святая во веки.
И первопрестольник Российския Церкве, и исповедник Православныя веры, и обличитель грехолюбивых и мятежных, и строитель Русския земли был еси, святителю Ермогене, и за сие темницею и гладом мучимь был еси и приемь от Бога неувядаемый венец, со святители и мученики веселишися.
Премудрость, Престолу Божию приседящую, сопутницу стяжал еси себе во всем житии твоем, святителю отче Филарете, темже право правя слово Истины, наставил еси к богоразумию люди паствы твоея и житию праведному вся сыны Российския научил еси.
Преподобне отче Пимене, ты строитель дивный и восстановитель святыя обители, яже на Угреше явился еси, не токмо строения, но и души братии созидая и возставляя, тем же и Христос тебе паству иноческую всех обителей Московских вручает и славою небесною по преставлении венчает.
Мытареву покаянию подражая, страх Божий и смирение стяжал еси, праведне Василие, темже и душу слезами очистив, плод обилен израстил еси и многия заблуждшия к вере истинней привел еси, моли Христа Бога спастися душам нашим.
Богородичен: Подобием иконы Иверския не точию Афон просвещается, но и град Москва украшается и инии грады и веси освящаются, от тоя чудесную помощь приемлюще и источник утешения в ней обретающе, и нам, благая Вратарнице, двери райския отверзи.

Кондак гл.3
Возвеличися ныне, граде Москво,/ велиих даров духовных сподобляющися,/ яко сокровищница пречестная/ святыням и мощем угодник Божиих/ и отечество возлюбленное многим святым,/ к их же помощи усердно прибегаем:/ о святых Московских дивный сонме,/ вашими ученьми и деяньми/ вкупе и страданьми за Христа,/ души наша просветите/ и спасения нам присно будите ходатаи.
Песнь 7
Труды твоими апостольскими просветил есть Господь люди, во тме и сени сметрней седящия, темже яко добрый пастырь, святителю Иннокентие, указал еси им путь в Царство Небесное, всех научая пети: слава силе Твоей, Господи!
Радуйся, началовождю полка мучеников новых, святителю славный Владимире, иже на свещнице града Святаго Петра возсиявый, и наш град послежде светом добродетелей твоих озаривый, в Киев-град напоследок отшедый, и тамо кончину мученическую от лютых безбожник кротко приявый.
Рыдание, жалость и горе, се свиток Иезекиилев, егоже от руки Господни кротко приял еси, Патриарше Тихоне, и сердцем мужественным скорби тяжкия понесл еси и корабль Церкве Русския посреде волн безбожия бушующаго правоверно управил еси и ныне о нейже ко Христу Богу молися.
Священномучениче и богослове великий Илларионе, ты от Архиерея Великаго Крест архипастырства смиренно восприим, Тому последовал еси, вся заповеданная Им в житии своем ревностно исполнив, и за Церковь Его душу твою положил еси, и якоже в житии твоем за други и за враги тепле молился еси, тако и ныне за вся ны молися.
Радуйся иерею Божий Александре, купно со святителем Тихоном во Америце усердно потрудивыйся, такожде во граде Москве ему сподвизавыйся, храма Христа Спасителя служителю, и людей Божиих пастырю любвеобильный, последи же от безбожных казнь претерпевый и со всеми новомученики от Бога прославленный.
Любве Божия сосуде избранный, святагорскаго сада Богоматере благоухающий крине, людей московских утешителю, чудотворче прозорливый, старче блаженне Аристоклие, ты и ныне к народу нашему взываеши: людие, творите добро, да явит Господь милость свою над Росииею.
Богородичен: Нощь и мрак, и воды пререкания люте истязуют землю Твою, се убо прещение Божие и гнев Того есть, но молю Тя, Пречистая, молю и глаголю: аще хощещи, можеши, и вем, яко умолит Отроковица за державу Свою.
Песнь 8
Кто от земнородных не удивится твердости веры твоея, священномучениче Петре, ты бо о укрепляющем тя Иисусе поношения, злая льщения, изгнания, узы и мраз зельный претерпел еси, и ничтоже от сих любве Христовы разлучи тя.
К тебе с молитвою притекаем, о великая мати, святая преподобномученице Елисавето, и просим усердно: покрый всех заступлением твоим, болезни наша исцели, терпение во искушениих даруй, любовь ко всем стяжати помози и за враги молитися научи.
О, честный преподобноисповедниче Сергие, от юности за веру, Царя и Отечество подвизавыйся, Промыслом Божиим у кормила Святой Марфо-Мариинской обители поставленный, любве и смирения добрый образе, моли Христа, Емуже до конца верен пребыл еси, за люди вся града нашего, память твою любовию почитающия.
О, святии Алексие праведный Московский и преподобный Алексие Зосимовский, во дни испытаний тяжких и неверия губительнаго, народ Божий смятенный окормившии и души многия спасшии, молим вас: якоже и прежде, за люди града нашего Господа умолите.
Ублажим ныне Христовых стариц блаженных: Матрону, града Москвы ангелоподобную воительницу, и другую Матрону, в земле Рязанстей возсиявшую и во граде нашем житие страдальчески скончавшую, яже слепоту телесную духовным зрением изменившия и, немощни суще телом, ближним исцеления подававшия, и люди русския в годину смутную в вере утвердившия.
Радуйся, святителю Павлине милостиве, ты бо от юности путем монашеским последовав, в молитвах и поучениих, в трудех и терпении мнозе, в благости и любви нелицемерне, в словеси истины, в силе Божией, в скорбех и теснотах, в темницах и нестроениих служение твое беспорочно совершил еси, и за Христа смерть прияв, на Небесех жив еси.
Богородичен: Всех скорбящих радосте и обидимых покровительнице и граду нашему заступнице, Премилостивая Владычице, не премолчи вопиющи о нас ко Господу, Сыну и Богу Твоему, не престай о людех Твоих милосердующи, покрывати и спасати, и весело избавляти скорбей рабы Твоя.

Песнь 9
Священномучениче Серафиме, ты яко звезда пресветлая терпением, молитвою и любовию на небе церовнем просиял еси, и в серде твоем вся овцы Христовы не тесно вместил еси, не точию града Димитрова, но и всей земли Российстей.
Поклонимся братие, подвигу новосвященномученик Иоанна, Гавриила и Феодора, иже во храме сем Праведнаго Лазаря Господу служивших, и страдания за Христа безропотно приимших, и ныне за вся притекающия в храм сей молящихся.
Радуйся, сосуде, любве Божия исполненный, новая мученице Татиано, яко же Анастасия Узорешительница, верных, во узилищах мрачных и работах тяжких сущих, утешавшая и в нуждах телесных им послужившая и жизнь свою за добродетель сию положившая.
Днесь прославляется обитель Спасо-Бородинская, се бо яви Господь новую Свою угодницу, преподобную матерь Рахиль, словом и делом ближним послужившую, молитвою умиленною милость Божию им испросившую и безбожия тьму верою живою просветившую.
О, великое множество Новомучеников и Исповедников, горькия муки претерпевших, на поле Бутовстем и во иных местех многообразную смерть приявших, ныне в чертозех небесных водворяющеся, помяните соотчичей ваших, вас непрестанно на помощь призывающих.
Троичен: О, Троице честная, приими, яже земля Московская приносит Ти, яко начатки и яко фимиам избранный, вся угодившия и прежде и послежде в ней, знаемыя и незнаемыя, и молитвами их от всякаго вреда наследие их сохраняй.
Богородичен: Вемы тя, богоблагодатная, скорое погибших взыскание, нас, немощных, крепость и утверждение, духом, усты и сердцем зовем Ти: от напастей и печали свободи нас, Владычице, к Тебе прибегающих.
Светилен:
Звездами неисчетными небо украсивый, Господи, града нашего красоту показал еси нам—святыя вся в нем Тебе благоугодившия, и души наша к Царствию Нбесному путеводящия и радостию сердца наша в день сей празднственный исполняющия.

На хвалитех:
гл.2 подобен Доме Евфрафов:
Дом чудотворцев преславных,/ ты еси граде великий Москво,/ красуйся ныне и ликуй/ яко имеяй теми дерзновение // ко Господу Богу нашему!
Веры Православныя хранители,/ демонов губители/ и прогонители варваров/ вы есте святии вси Московстии,// молите о душах наших!
Град ваш храните,/ люди заступите,/ страну Российскую от всяких злых избавите,/ и Бога молите// непрестанно о душах наших!
Слава глас и подобен той же:
Троицу Пресвятую/ житием своим и молитвами прославльшия/ и Богу праведно угодившия/ приидите восхвалим// святыя вся в пределех Московких просиявшия.
И ныне глас и подобен той же:
В доме Богородицы/ день Успения Ея торжествовавшии,/ приидите умолим Живота Матерь,/ не оставити// люди Своя во веки!
На Литургии блаженства:
Приидите, братие, восхвалим и песненныя дары принесем всем святым в земле Московстей просиявшим, и, подвиги и труды их почитающе, ко Христу возопиим, о Владыко, подаждь нам слово, во еже достойно тех прославити.
ИЛИ:
О велицыи сродницы наши, именованнии и безыменнии, явленнии и неявленнии, Небеснаго Сиона достигшии и славу многу от Бога приимшии, утешение нам, в скорби сущим, испросите, веру нашу падшую возставите и люди расточенныя соберите, от нас, яко дар, песнь благодарения приемлюще.
О, великое множество Новомучеников и Исповедников, горькия муки претерпевших, на поле Бутовстем и во иных местех многообразную смерть приявших, ныне в чертозех небесных водворяющеся, помяните соотчичей ваших, вас непрестанно на помощь призывающих.
Слава: О, Троице честная, приими, яже земля Московская приносит Ти, яко начатки и яко фимиам избранный, вся угодившия и прежде, и послежде в ней, знаемыя и незнаемыя, и молитвами их от всякаго вреда наследие их сохраняй.
И ныне: Вемы тя, богоблагодатная, скорое погибших взыскание, нас, немощных, крепость и утверждение, духом, усты и сердцем зовем Ти: от напастей и печали свободи нас, Владычице, к Тебе прибегающих.