 |
Песнь 7-я. Братия: Христос воскресе из мертвых, смертию смерть поправ, и сущим во гробех живот даровав. Смерти празднуем умерщвление, адово разрушение, иного жития вечнаго начало, и играюще поем виновнаго, Единаго благословеннаго отцев Бога и препрославле
|
|
|
|
Песнь 7-я.
Ирмос:
Отроки от пещи избавивый, быв человек, страждет яко смертен, и страстию смертное в нетления облачит благолепие, Един благословен отцев Бог, и препрославлен.
Братия:
Христос воскресе из мертвых, смертию смерть поправ, и сущим во гробех живот даровав.
Жены с миры богомудрыя в след Тебе течаху: Егоже яко мертва со слезами искаху, поклонишася радующияся Живому Богу, и Пасху тайную Твоим, Христе, учеником благовестиша.
Братия:
Христос воскресе из мертвых, смертию смерть поправ, и сущим во гробех живот даровав.
Смерти празднуем умерщвление, адово разрушение, иного жития вечнаго начало, и играюще поем виновнаго, Единаго благословеннаго отцев Бога и препрославленнаго.
Братия:
Христос воскресе из мертвых, смертию смерть поправ, и сущим во гробех живот даровав.
Яко воистинну священная и всепразднственная, сия спасительная нощь, и светозарная, светоноснаго дне, востания сущи провозвестница: в нейже безлетный Свет из гроба плотски всем возсия.
Богородичны (в первый день Пасхи не поются, а поются со второго дня святой Пасхи и до дня отдания в среду перед Вознесением):
Умертвив Сын Твой смерть, Всенепорочная, днесь, всем смертным пребывающий живот во веки веков дарова, Един благословенный отцев Бог и препрославленный.
Всем царствуяй созданием, быв человек, вселися в Твою, Богоблагодатная, утробу, и распятие претерпев и смерть, воскресе боголепно, совозставив нас яко всесилен.
Катавасия (повторяем первый Ирмос):
Отроки от пещи избавивый, быв человек, страждет яко смертен, и страстию смертное в нетления облачит благолепие, Един благословен отцев Бог, и препрославлен.
Братия:
Христос воскресе из мертвых, смертию смерть поправ, и сущим во гробех живот даровав.
(Трижды)
|
|
|
Старший может кадить мирянским кадилом и возглашает:
Христос воскресе!
на что братия отвечают всякий раз:
Воистину воскресе!
(Трижды):
Песнь 8-я.
Ирмос:
Сей нареченный и святый день, един суббот Царь и Господь, праздников праздник, и торжество есть торжеств: в оньже благословим Христа во веки.
Братия:
Христос воскресе из мертвых, смертию смерть поправ, и сущим во гробех живот даровав.
Приидите, новаго винограда рождения, божественнаго веселия, в нарочитом дни воскресения, Царствия Христова приобщимся, поюще Его яко Бога во веки.
Братия:
Христос воскресе из мертвых, смертию смерть поправ, и сущим во гробех живот даровав.
Возведи окрест очи твои, Сионе, и виждь: се бо приидоша к тебе, яко богосветлая светила, от запада, и севера, и моря, и востока чада твоя, в тебе благословящая Христа во веки.
Троичен:
Пресвятая Троице Боже наш, слава Тебе.
Отче Вседержителю, и Слове, и Душе, треми соединяемое во ипостасех естество, пресущественне и пребожественне, в Тя крестихомся, и Тя благословим во вся веки.
Богородичны (в первый день Пасхи не поются, а поются со второго дня святой Пасхи и до дня отдания в среду перед Вознесением):
Прииде Тобою в мир Господь, Дево Богородице, и чрево адово расторг, смертным нам воскресение дарова: темже благословим Его во веки.
Всю низложив смерти державу Сын Твой, Дево, Своим воскресением, яко Бог крепкий совознесе нас и обожи: темже воспеваем Его во веки.
Катавасия (повторяем первый Ирмос):
Сей нареченный и святый день, един суббот Царь и Господь, праздников праздник, и торжество есть торжеств: в оньже благословим Христа во веки.
Братия:
Христос воскресе из мертвых, смертию смерть поправ, и сущим во гробех живот даровав.
(Трижды)
Старший может кадить мирянским кадилом и возглашает:
Христос воскресе!
на что братия отвечают всякий раз:
Воистину воскресе!
(Трижды):
|
|
|
Песнь 9-я.
1-й Припев:
Величит душа моя воскресшаго тридневно от гроба Христа Жизнодавца.
Ирмос:
Светися, светися, новый Иерусалиме: слава бо Господня на тебе возсия, ликуй ныне и веселися Сионе! Ты же Чистая красуйся Богородице, о возстании Рождества Твоего.
2-й Припев:
Величит душа моя волею страдавша, и погребена и воскресшаго тридневно от гроба.
Ирмос:
Светися, светися, новый Иерусалиме: слава бо Господня на тебе возсия, ликуй ныне и веселися Сионе! Ты же чистая красуйся Богородице, о возстании рождества Твоего.
3-й Припев:
Христос новая Пасха, Жертва живая, Агнец Божий, вземляй грехи мира.
Стих:
О божественнаго, о любезнаго, о сладчайшаго Твоего гласа! С нами бо неложно обещался еси быти до скончания века, Христе: Егоже вернии, утверждение надежды имуще, радуемся.
4-й Припев:
Ангел вопияше Благодатней: чистая Дево, радуйся, и паки реку, радуйся: Твой Сын воскресе тридневен от гроба, и мертвыя воздвигнувый, людие, веселитеся.
Стих:
О божественнаго, о любезнаго, о сладчайшаго Твоего гласа! С нами бо неложно обещался еси быти до скончания века, Христе: Егоже вернии, утверждение надежды имуще, радуемся.
5-й Припев:
Возбудил еси уснув мертвыя от века, царски рыкавый, яко от Иуды лев.
Братия:
Христос воскресе из мертвых, смертию смерть поправ, и сущим во гробех живот даровав.
6-й Припев:
Магдалина Мария притече ко гробу, и Христа видевши, яко вертоградаря вопрошаше.
Братия:
Христос воскресе из мертвых, смертию смерть поправ, и сущим во гробех живот даровав.
7-й Припев:
Ангел облистаяй женам вопияше: престаните от слез, яко Христос воскресе.
Стих:
О Пасха велия и священнейшая, Христе! О мудросте, и Слове Божий, и сило! Подавай нам истее Тебе причащатися, в невечернем дни Царствия Твоего.
8-й Припев:
Христос воскресе, смерть поправый, и мертвыя воздвигнувый, людие веселитеся.
Братия:
Христос воскресе из мертвых, смертию смерть поправ, и сущим во гробех живот даровав.
9-й Припев:
Днесь всяка тварь веселится и радуется, яко Христос воскресе и ад пленися.
Братия:
Христос воскресе из мертвых, смертию смерть поправ, и сущим во гробех живот даровав.
10-й Припев:
Днесь Владыка плени ада, воздвигнувый юзники, яже от века имяше люте одержимыя.
|
|
|
Братия:
Христос воскресе из мертвых, смертию смерть поправ, и сущим во гробех живот даровав.
11-й Припев:
Величит душа моя Триипостаснаго и нераздельнаго Божества державу.
Братия:
Христос воскресе из мертвых, смертию смерть поправ, и сущим во гробех живот даровав.
12-й Припев:
Радуйся, Дево, радуйся, радуйся, Благословенная, радуйся Препрославленная: Твой бо Сын воскресе тридневен от гроба.
Братия:
Христос воскресе из мертвых, смертию смерть поправ, и сущим во гробех живот даровав.
Повторение 1-го Припева:
Величит душа моя воскресшаго тридневно от гроба Христа Жизнодавца.
1-е Повторение Ирмоса:
Светися, светися, новый Иерусалиме: слава бо Господня на тебе возсия, ликуй ныне и веселися Сионе! Ты же чистая красуйся Богородице, о возстании рождества Твоего.
Повторение 2-го Припева:
Величит душа моя волею страдавша, и погребена и воскресшаго тридневно от гроба.
2-е повторение Ирмоса:
Светися, светися, новый Иерусалиме: слава бо Господня на тебе возсия, ликуй ныне и веселися Сионе! Ты же чистая красуйся Богородице, о возстании рождества Твоего.
3-е повторение Ирмоса:
Светися, светися, новый Иерусалиме: слава бо Господня на тебе возсия, ликуй ныне и веселися Сионе! Ты же чистая красуйся Богородице, о возстании рождества Твоего.
Братия:
Христос воскресе из мертвых, смертию смерть поправ, и сущим во гробех живот даровав.
(Трижды)
Богородичны (в первый день Пасхи не поются, а поются со второго дня святой Пасхи и до дня отдания в среду перед Вознесением):
Согласно, Дево, Тебе блажим вернии: радуйся, двере Господня, радуйся граде одушевленный; радуйся, Еяже ради нам ныне возсия свет из Тебе Рожденнаго из мертвых воскресения.
Веселися и радуйся, божественная двере Света: зашедый бо Иисус во гроб, возсия, просияв солнца светлее, и верныя вся озарив, богорадованная Владычице.
Братия:
Христос воскресе из мертвых, смертию смерть поправ, и сущим во гробех живот даровав.
(Трижды)
Старший может кадить мирянским кадилом и возглашает:
Христос воскресе!
на что братия отвечают всякий раз:
Воистину воскресе!
(Трижды):
|
|
|
Ексапостиларий, самогласен
Плотию уснув, яко мертв, Царю и Господи, тридневен воскресл еси, Адама воздвиг от тли, и упразднив смерть: Пасха нетления, мира спасение.
(Трижды)
Братия поет:
Всякое дыхание да хвалит Господа.
Хвалите Господа с небес, хвалите Его в вышних.
Тебе подобает песнь Богу.
Хвалите Его вси ангели Его, хвалите Его вся силы Его.
Тебе подобает песнь Богу.
Чтец:
Хвалите Его солнце и луна: хвалите Его вся звезды и свет. Хвалите Его небеса небес, и вода яже превыше небес, да восхвалят имя Господне. Яко Той рече, и быша: Той повеле, и создашася. Постави я в век, и в век века: повеление положи, и не мимо идет. Хвалите Господа от земли змиеве, и вся бездны: огнь, град, снег, голоть, дух бурен, творящая слово Его: горы и вси холми, древа плодоносна, и вси кедри: зверие и вси скоти, гади и птицы пернаты: царие земстии, и вси людие, князи и вси судии земстии: юноши и девы, старцы с юнотами да восхвалят имя Господне: яко вознесеся имя Того Единаго. Исповедание Его на земли, и на небеси, и вознесет рог людей Своих. Песнь всем преподобным Его, сыновом Израилевым, людем приближающымся Ему.
Воспойте Господеви песнь нову, хваление Его в церкви преподобных. Да возвеселится Израиль о Сотворшем его, и сынове Сиони возрадуются о Цари своем: Да восхвалят имя Его в лице, в тимпане и псалтири да поют Ему. Яко благоволит Господь в людех Своих, и вознесет кроткия во спасение. Восхвалятся преподобнии во славе, и возрадуются на ложах своих. Возношения Божия в гортани их, и мечи обоюдуостры в руках их: сотворити отмщение во языцех, обличения в людех: связати цари их путы, и славныя их ручными оковы железными.
Чтец:
Сотворити в них суд написан: слава сия будет всем преподобным Его. Хвалите Бога во святых Его, хвалите Его во утвержении силы Его.
Стих:
Хвалите его на силах Его, хвалите Его по множеству величествия Его.
Поем Твою Христе спасительную страсть, и славим Твое воскресение.
Стих:
Хвалите Его во гласе трубнем, хвалите Его во псалтири и гуслех.
Крест претерпевый, и смерть упразднивый, и воскресый из мертвых, умири нашу жизнь Господи, яко един всесилен.
Стих:
Хвалите Его в тимпане и лице, хвалите Его во струнах и органе.
Ада пленивый, и человека воскресивый, воскресением твоим Христе, сподоби ны чистым сердцем, Тебе пети и славити.
Стих:
Хвалите Его в кимвалех доброгласных, хвалите Его в кимвалех восклицания, всякое дыхание да хвалит Господа.
Боголепное Твое снизхождение славяще, поем Тя Христе: родился от Девы, и неразлучен был еси от Отца: пострадал еси яко человек, и волею претерпел еси крест, воскресл еси от гроба яко от чертога произшед, да спасеши мiр, Господи слава Тебе.
|
|
|
Стихиры Пасхи
Все вместе поют стихиры Пасхи. Глас 5-й.
Стих:
Да воскреснет Бог, и расточатся врази Его.
Пасха священная нам днесь показася: Пасха нова святая: Пасха таинственная: Пасха всечестная: Пасха Христос Избавитель: Пасха непорочная: Пасха великая: Пасха верных: Пасха двери райския нам отверзающая: Пасха всех освящающая верных.
Стих:
Яко исчезает дым, да исчезнут.
Приидите от видения жены благовестницы, и Сиону рцыте: приими от нас радости благовещения, воскресения Христова: красуйся, ликуй, и радуйся Иерусалиме, Царя Христа узрев из гроба, яко Жениха происходяща.
Стих:
Тако да погибнут грешницы от лица Божия, а праведницы да возвеселятся.
Мироносицы жены, утру глубоку, представша гробу Живодавца, обретоша ангела на камени седяща, и той провещав им сице глаголаше: что ищите живаго с мертвыми; что плачите нетленного во тли; шедше проповедайте учеником Его.
Стих:
Сей день, егоже сотвори Господь, возрадуемся и возвеселимся вонь.
Пасха красная, Пасха, Господня Пасха, Пасха всечестная нам возсия. Пасха, радостию друг друга об’имем. О Пасха! Избавление скорби, ибо из гроба днесь яко от чертога возсияв Христос, жены радостию исполни глаголя: проповедите апостолом.
Слава Отцу и Сыну и Святому Духу, и ныне и присно и во веки веков. Аминь: глас 5-й:
Воскресения день, и просветимся торжеством, и друг друга об’имем. Рцем братие, и ненавидящим нас, простим вся воскресением, и тако возопиим:
Братия:
Христос воскресе из мертвых, смертию смерть поправ, и сущим во гробех живот даровав.
(Трижды)
После этого поется сей тропарь еще много раз, пока братия целуют друг друга, начиная с старшего брата.
При этом старший восклицает:
Христос воскресе!
На что подходящий к целованию брат или сестра отвечают:
Воистину воскресе.
После целования читается огласительное слово Иоанна Златоуста:
Слово огласительно иже во святых отца нашего ИОАННА, архиепископа Константинопольскаго, Златоустаго, во святый и светоносный день преславнаго и спасительнаго Христа Бога нашего Воскресения
Аще кто благочестив и боголюбив, да насладится сего добраго и светлаго торжества. Аще кто раб благоразумный, да внидет, радуяся, в радость Господа своего. Аще кто потрудися постяся, да восприимет ныне динарий. Аще кто от перваго часа делал есть, да приимет днесь праведный долг. Аще кто по третием часе прииде, благодаря да празднует. Аще кто по шестом часе достиже, ничтоже да сумнится, ибо ничимже отщетевается. Аще кто лишися и девятаго часа, да приступит, ничтоже сумняся, ничтоже бояся. Аще кто точию достиже и во единонадесятый час, да не устрашится замедления: любочестив бо Сый Владыка, приемлет последняго якоже и перваго: упокоевает в единонадесятый час пришедшаго, якоже делавшаго от перваго часа. И последняго милует, и первому угождает, и оному дает, и сему дарствует, и дела приемлет, и намерение целует, и деяние почитает, и предложение хвалит.
Темже убо внидите вси в радость Господа своего: и первии и втории, мзду приимите. Богатии и убозии, друг со другом ликуйте. Воздержницы и ленивии, день почтите. Постившиися и непостившиися, возвеселитеся днесь. Трапеза исполнена, насладитеся вси. Телец упитанный, никтоже да изыдет алчай, вси насладитеся пира веры: вси восприимите богатство благости.
Никтоже да рыдает убожества, явися бо общее Царство. Никтоже да плачет прегрешений, прощение бо от гроба возсия. Никтоже да убоится смерти, свободи бо нас Спасова смерть. Угаси ю, Иже от нея держимый, плени ада, Сошедый во ад. Огорчи его вкусивша плоти Его. И сие предприемый Исаиа возопи: ад, глаголет, огорчися, срет Тя доле: огорчися, ибо упразднися: огорчися, ибо поруган бысть: огорчися, ибо умертвися: огорчися, ибо низложися: огорчися, ибо связася. Прият тело, и Богу приразися: прият землю, и срете небо: прият еже видяше, и впаде во еже не видяше. Где твое, смерте, жало? Где твоя, аде, победа? Воскресе Христос, и ты низверглся еси. Воскресе Христос, и падоша демони. Воскресе Христос, и радуются Ангели. Воскресе Христос, и жизнь жительствует. Воскресе Христос, и мертвый ни един во гробе. Христос бо, востав от мертвых, Начаток усопших бысть. Тому слава и держава во веки веков.
Аминь.
Также читаем тропарь святого. Глас 8-й:
Уст твоих якоже светлость огня возсиявши благодать, вселенную просвети: не сребролюбия мiрови сокровища сниска, высоту нам смиреномудрия показа, но твоими словесы наказуя, отче Иоанне Златоусте, моли Христа Бога, спастися душам нашим.
Братия:
Христос воскресе из мертвых, смертию смерть поправ, и сущим во гробех живот даровав.
(6 раз)
Старший:
Премудрость.
Братия:
Благослови.
Старший поет:
Христос воскресе из мертвых, смертию смерть поправ.
Братия:
И сущим во гробех живот даровав.
И старший говорит отпуст:
Господи, Иисусе Христе, Сыне Божий, молитвами Пречистыя Твоея Матере, преподобных и богоносных отец наших и всех святых, помилуй и спаси нас.
Старший восклицает:
Христос воскресе!
Братия:
Воистину воскресе.
(Трижды)
Братия:
Христос воскресе из мертвых, смертию смерть поправ, и сущим во гробех живот даровав.
(Трижды)
Братия:
И нам дарова живот вечный, покланяемся Его тридневному воскресению.
|
|
|
