 |
О духовъныхъ, яко мають служъбу земъскую служити.
|
|
|
|
Уставуемъ тежъ, ижъ вси духовъные з ыменей своихъ светъскихъ и костелъныхъ наданых, с которыхъ служъба земъская военъная бывала, такъже з ыменей своихъ отчизных, купленых и закупленых шляхетъскихъ, войне повинъныхъ, службу земъскую военъную мають служити тымъ обычаемъ, выправуючи с тыхъ именей своихъ почотъ повинный и при немъ за свою особу ч[е]л[о]в[е]ка доброго шляхтича, войне годного, водле уфалы земъское соймовое. А тые почты свои становити мають подъ хоруговъю поветовою межы обывателей тыхъ поветовъ, в которыхъ хто з нихъ именья головнейшие маеть. Теж за позволеньемъ всихъ становъ а за прозбою колиятовъ колеиумъ Виленьского зъ именей тых, которые от кого кольвекъ на тое ку колеиумъ наданые албо якимъ кольвекъ способомъ набытые до сего часу мають, от выправованья на службу земъскую военъную волными чынимъ. Але естли што болшъ именей до того колеиумъ Виленьского якимъ кольвекъ способом по выданью сего статуту потомъ набыли, с таковыхъ всихъ они потомъ на службу земъскую военъную почты с тыхъ именей повинъни, ровно яко и шляхта великого князства литовъского, выправовати будуть повинъни. Вед же гдЪ бы на сойме сполномъ податокъ який на оборону речы посполитое былъ ухваленъ, тогды они со всихъ добръ своих колеятъскихъ, якимъ кольвекъ обычаемъ первей сего и потомъ набытыхъ, таковый податокъ выдавати будуть повинъни. А справы судовые зо всихъ тыхъ добръ своих, которые теперъ набытые мають, отправовати будуть тымъ же способомъ, яко инъшые станы духовные.
Артыкулъ 10.
Абы се по шыхованью з войска не роз[ъ]ежъдчали и о станехъ.
Теж уставуемъ, ижъ кождый подданый нашъ, пописавъшисе у ших обычаемъ вышей писанымь с тыми жъ коньми и з бронями, с которыми се показалъ при насъ або при гетмане нашомъ, повиненъ будеть войну служити на тыхъ же конях и с тыми жъ зброями ажъ до суполного роспущенья войска нашого. А который бы кольвекъ подъданый нашъ, хотя пописавшисе и шиховавшисе, без воли и ведомости гетманьское з войска проч поехалъ або што почту своего повинъного до дому отпустилъ, таковый именье тратит, яко бы войны не служилъ. А естли бы тотъ, хто пенези у кого на службу военъную бравъшы, а былъ бы чоловекъ неоселый, а то тежъ учинилъ, таковый кождый честь свою тратить такъ, яко бы з битвы утекъ. А на пописе маеть кождого коня гетман нашъ казати, у шерсть написати и петно, которое на кони будеть, на рейстре намалевати. А станы свои поветники на войне при хоружомъ въ одномъ местъцы мети мають, а не розно.
|
|
|
Артыкулъ 11.
Которые для немоцы своее на войну ехати не могуть.
Уставуемъ тежъ, естли бы хто кольвекъ повинъный войну служити з божъего допущенья былъ немоцонъ обложною хоробою, за которою на службу нашу ехати бы не могъ, а не мелъ бы сына дорослого, тогды маеть се оповедати хоружому своему, у которого естъ повете, а при немъ трема шляхтичомъ, которые, немоцы его очима своими огледавшы, и то мають намъ або гетману нашому оповедати под сумненьемъ своимъ. А почотъ свой зъ именей и на свое местъце чоловека доброго и годного на войну предъсе послати повиненъ. А панове рады и врядники нашы и иные станы, которые под хоруговъю поветовою не стоять, таковые у хоробе своей предъсе тымъ же обычаемъ водле уфалы земское и важности именья своего почотъ выправовати на войну. А ведъ же под часомъ военънымъ таковый, хто обложною хоробою немоцонъ, маеть оповедатисе намъ, г[о]с[по]д[а]ру, а в небытности нашой, ино гетману нашому. А по з[ъ]еханью з войны кождый с пановъ радъ и иных становъ маеть речы добрымъ словомъ передъ нами, г[о]с[по]д[а]рем, ижъ правдиве обложною хоробою былъ немоцонъ.
|
|
|
Артыкулъ 12.
О сынехъ и о заступованье войны одинъ за другого.
Тежъ уставуемъ: хто бы с подданых нашихъ шляхъты, будучи самъ здоровъ, а мелъ сыны у себе дорослые в осмънадцати летехъ, а не нижей, а тотъ сынъ не был бы с нимъ делный, або и делъный, а был бы годный ку служъбе военой, тогды таковый сынъ за отца можеть войну служити с почтом отца своего. А вед же тотъ и таковый отецъ того сына своего маеть привести до хоружого своего, в котором повете естъ, и ему оповедати. А хоружий маеть его гетъману нашому оповедати. А гетъманъ нашъ будет повиненъ такового ку попису и ку служъбе нашой приняти.
Артыкулъ 13.
Хто бы замешкалъ на рокъ до войска прыехати.
Уставуемъ, естли бы хто замешкалъ року на пописъ, через листы наши положоного, и до войска не поспешил се, и на рокъ у насъ и у гетмана нашого, великого князства литовъского, не постановил без слушное причины, тогды таковых огуръных а непослушных гетманъ нашъ великий в особъливый рейстръ маеть казати уписати и того доложивъшы, якъ который долъго замешкалъ. А тые вси такимъ способомъ карани быти мають, ижъ мы, г[о]с[по]д[а]ръ, через пана гетмана литовъского маемъ ихъ послати на границы або тамъ, где того потреба речи посполитой окажеть. А они водвое такъ много, яко замешкали, тамъ заслуговати будут повинъни. А то се маеть розуметь о посполитом рушенью съ сойму.
Артыкулъ 14.
Хто бы з битвы утекъ.
Уставуем тежъ: хто бы з битвы утекъ, таковый за слушнымъ доводомъ от гетмана черезь вырокъ нашъ, г[о]с[по]д[а]ръский, именье и честь тратить.
Артыкулъ 15.
Которые на войне коней, зброй и броней своихъ кому позычають.
Тежъ уставуемъ: хто бы кому на войне, будучы у войску, позычил до оказу пописаного коня, зброи и всякое брони, с чимъ самъ приехалъ служити, а то бы на него было переведено, от того таковый статокъ позычоный увесь через гетмана нашого, великого князства литовъского, забранъ быти маеть.
Артыкулъ 16.
По чому от попису брати.
Уставуемъ, абы гетманъ нашъ, великого князства, не казалъ большей брати от попису войска нашого писаромъ своимъ, толко по полугрошку литовъскому от коня за працу ихъ, а то в тотъ часъ, коли се войско нашо зъежъдчаеть. А коли войско нашо маеть быти роспущоно, тогды не маеть гетманъ, ани его писары, от попису ничого брати под ласкою нашою. А гетманъ з рейстру войско роспущати маеть. Вед же квитовъ шляхте от гетьмана при роспущенью войска не будеть потреба брати, опрочъ хто бы самъ для яких потребъ своихъ потребовалъ квитъ взяти. А гетманове мають рейстра списанья войска порадные мети и с пилностью ихъ ховати и писары свои на пописъ войска люди добрие, шляхту, и к тому присяглыхъ мети.
|
|
|
Артыкулъ 17.
О хоружихъ, абы земянъ дома не осаживали и не отпущали.
Уставуемъ теж и приказуемъ, абы хоружие наши не смели жаден з них земенина и кожъдого стану ч[е]л[о]в[е]ка, войне належачого, дома от войны вызваляти [так!] и з дороги або з войска отпущати. А естли бы се который земенинъ дома зосталъ, а хоружий бы того передъ гетманомъ не поведалъ и утаилъ, а то бы на него было переведено, ижъ то умыслне учинилъ, тогды таковый хоружый врядъ свой, хоружъство, тратить.
Артыкулъ 18.
|
|
|
