 |
О наезды на домы и на гумна шляхетъские.
|
|
|
|
Уставуемъ: хто бы, на войне будучы або в дорозе до войска, будь тежъ з войска тягнучы, кому з духовныхь або светъскихъ станов на домъ або на гумно наеждчалъ або ставы и сажовки волочыл, або якие кольвекъ шкоды починилъ и при такомъ наезде кгвалтовномъ естли бы кого в дому таковомъ забилъ або ранилъ, збилъ або кгвалтъ, насилье белой голове учинилъ, тогды тотъ маеть за слушнымъ доводомъ горлом каран быти. А кгвалтъ и шкоды зособна за кождое наеханье платити з маетности своее рухомое и лежачое. А пакли бы не забилъ, ани ранилъ и бою, збытку жадного не вделалъ, только што взялъ або шкоду якую учинилъ, тоть виненъ будеть кгвалтъ и шкоду за доводомъ слушнымъ совито платити. А о такие кривды, шкоды укривжоный маеть собе справедливости доводити в тягненью передъ хоружим або кашталяномъ, або воеводою водлугъ артыкулу шостого в семъ же розделе. А у войску - передъ гетманомъ литовъскимъ. А гдЪ бы хто зъ якихъ причинъ не могъ собе справедливости в тягненью або у войску передъ гетманомъ довести, таковому и потомъ волно будеть з оселымъ справедливости собе доводити и у суду належного, водлугъ учинку позываючы о то на рокъ першый завитый, такъ до вряду земъского, яко и кгродъского. А з неоселымъ тамъ собе справедливости доводити, гдЪ бы подъ которымъ врядомъ его пристегнути могъ, або передъ паном его, кому бы служилъ.
Артыкулъ 19.
О жывности на войне, кому бы не доставало.
Уставуемъ: кому бы с подданыхъ нашихъ, будучи на войне, лежачы войскомъ на одномъ местъцы, живности на самого або на кони его не доставало, таковый з вижомъ гетманьскимъ маеть ехати и взяти с потребу живности на себе и на кони, а заплатити водлугъ уставы, от насъ або гетмана нашого на то положоное подлугъ урожаю. Нижли дрова мають брати волно, гдЪ стояти будуть, але домовъ розъбирати и плотовъ жечы, ставовъ и сажовокъ волочити, ани спущати, жытъ, ярынъ умысльне травити, ани топтати не мають. А хто бы таковый кому шкоду учинилъ, тотъ шкоду совито маеть заплатити. А естли бы хто на збож[ъ]яхъ и яринахъ обозомъ умыслне положился и шкоду учинилъ, такового панъ гетманъ карати водле шкодъ и выступу его маеть з нагородою слушною в томъ укривжоному. А хто бы тежъ, маючи живности у себе ув обозе досыть, а предъсе ее не вживаючы, инъшое собе найдовалъ и за вижомъ бралъ, таковый то, што возметь, тому, у кого взялъ, совито ворочати або платити маеть.
|
|
|
Артыкулъ 20.
О бранье вижа на жывность отъ гетъмановъ и што ему давати.
Тежъ уставуем, хотечи мети, ижъ, будучи на войне, кому бы для недостатку живности вижа была потреба, тогды гетманъ нашъ виненъ будеть вижовъ придавати на скупован[ь]е живности, а вижом его вижованого ничого не маеть быти давано, одно ж на кгвалъты, бои к тому, хто бы на шкоду свою бралъ вижа, таковымъ вижованого маеть быти давано на милю по грошу. А естли на местцу, не едучи мили, такежъ маеть по грошу дати.
Артыкулъ 21.
О кгвалътъ або о находъ военъный в обозе.
Тежъ уставуемъ, естли бы хто, будучи на служъбе нашой, будь в обозе або в тегненью на дорозе, одинъ на другого умысьлне [так!] або обычаем зъвады наехал, або нашол на обозъ або на стан кгвалтом и кого забил або ранил, а было бы то на него переведено, тот горло тратит. А естли бы не ранилъ, але, умыслне або свовольне нашедши, ударилъ, а хотя и не ударил, але словы неучъстивыми соромотилъ, або шкоду якую учинилъ, такового панъ гетманъ за доводомъ слушнымъ карати маеть водле бачен[ь]я своего и водлугъ артыкулов, которые бы на онъ часъ о спокойномъ захованью у войску выданы были.
Артыкулъ 22.
|
|
|
О людехъ пенежъных, яко мають з ыменей своих служъбу земъскую служити.
Тежъ уставуемъ: хто бы кольвекъ с подданых наших пенези наши або у пановъ радъ, князей, пановъ и иных становъ ку служъбе военной ездной або пешой бралъ, таковые люди пенежъные, ротмистры и ихъ товарыши особами своими тые, што за пенези наши, г[о]с[по]д[а]ръские, служити будуть в гуфе нашомъ пенежном. А тые, которые у кого иного пенези будуть брали, в почте того, в кого пенези взяли, становитисе и за особы свои людей годных шляхетскихъ с почты, которые з ыменей своихъ винни ставити, под хоруговъю поветовою повинни будуть уставичне мети и ставити под тою жъ виною, на неприбылыхъ до служъбы военное вышей описаною, абы за тыми пенезми, которые на службу жолънерскую беруть, служъба земъская з ыменей ихъ не гинула.
Артыкулъ 23.
О приймован[ь]ю людей служебныхъ прибылыхъ, и яко се они в тягненью заховатисе мають.
Тежъ уставуемъ, ижъ людей прибылыхъ такъ объчыхъ, яко и суседних заграничников приймовати и вести до паньства нашего, великого князства литовского, и черезъ тое жъ паньство не маемъ ажъ з ведомостью и за радами рад нашихъ великого князства литовъского. Вед же тые люди прыбылые, яко тежъ и тутошние жолънеры, не мають иншими дорогами до инъшого местъца тягнути и на лежахъ се роскладати, одно тамъ, где мы, г[о]с[по]д[а]ръ, або гетманъ великий того ж великого князства ознаймит и лежи роспишеть. А з дороги, з лежъ, имъ от насъ и от гетмана великого даныхъ ознайменыхъ, они езъдити у пицованье нигдЪ не мають, але тамъ, у дорозе, на ночлегохъ и на лежахъ з сторонъ живность звезеную або торгомъ або уставою, яко мы зъ радами нашими уфалимъ або гетманъ в небытности нашой установить, мають куповати. А порадокъ до даванья тое живности и цену такъже мы зъ радами нашими сего ж паньства в онъ часъ уфалимъ водле потребы.
Артыкулъ 24.
О неданье пенезей на роты станомъ, нижей описанымъ.
Уставуемъ, ижъ часу войны, которая бы зъ уфалы соймовое рушеньемъ посполитымъ отправовала, не маемъ воеводамъ, старостамъ и державцамъ украинънымъ на тые замъки, гдЪ староства и деръжавы мають, на роты давати, але зъ своими властными почты, з врядовъ ихъ повинъными, тамъ зоставати мають. А ведъ же тотъ замокъ ротъмистрами и людомъ служебнымъ водле потребы опатровати маемъ, которые ротъмистры под владзою и справою того старосты и дерьжавцы быти мають. Ведъ же не уймуючы владзы гетмана великого ни в чом, кгды жъ не одно ротъмистрове, але и сами старостове украинъные часу войны подъ владзу и послушеньство гетманьское належать. А естли быхмо потребовали которого с тыхъ воевод, старостъ и деръжавец до поля, того намъ звести оттуль и пенези на служебные дати ему волно будеть.
|
|
|
Артыкулъ 25.
О блюдяги на войне.
Уставуемъ и такъ то мети хочемъ, абы кождый у войску нашом в тягненью не смелъ коня блудяги деръжати у себе болшъ, толко через ночъ и день, але по томъ часе замеронымъ маеть его заразомъ вести до гетмана нашого литовъского. А естли бы гетманъ далеко былъ, тогды до старшого своего, а онъ того жъ часу маеть до гетмана отослати. А хто бы блюдягу держал далей, нижли через тот часъ помененый, таковый того коня повиненъ зъ навезкою верънути. Такъ тежъ и кождую речъ, знашодъшы, нести до гетмана. А гетманъ нашъ маеть казати от блюдягъ болшей не брати, толко от коня грошъ, а о инъшые речы в обозе гетманьскомъ закликати и тое, што нашол, маеть до вряду гетманьского отдати, а урядъ гетманьский тому, чие што будеть, маеть казати отдати даръмо.
Артыкулъ 26.
|
|
|
