 |
О доходе або заплате возному.
|
|
|
|
Возному за працу его по тому маеть быти давано, то естъ коли где на которую кольвекъ справу поедеть, тогды ему от мили по грошу ув одну сторону, а што назадъ поедеть, за то ничого брати не маеть. А естли мили не поедеть або на местъцу позвы або якие кольвекъ листы г[о]с[по]д[а]ръские або врядовые дасть, огледати кгвалъту, ранъ, бою, шкодъ або прислухивати чого будеть, предьсе ему от того грошъ, а отъ осветъченья - грошъ. А где на увязанье поедеть, с тыхъ же людей, в которые увязывати будеть, зъ службы по грошу брати маеть, а от полъслужъбы - полъгроша, а с пустовщыны таковое, которую пашуть, полъгроша, а от моръкгу - пенезь одинъ, а от сумы пенезей, отправуючи ее на рухомыхъ речахъ, от копы по два пенези брати будеть. А от пустовъщинъ и моръкговъ пустыхъ доходъ возному сторона жалобная винъна при увязанью дати. А ей то потомъ от стороны противное при его суме сказаной часу выкупенья заплачоно быти маеть. А от огледанья испаши и от окопован[ь]я шкоды возному грошъ, от воланья сторонъ за позвы ку праву - грошъ, от заказыванья на рокохъ ку праву - грошъ.
Артыкулъ 11.
О беспечности возного, будучи ему на справахъ, вряду его належачихъ, такъже и стороне, при немъ будучой.
Уставуемъ тежъ, естли бы хто возного на справе за листы воеводъ, старостъ, вряду замкового и земъского албо суду головного трибунальского любъ тежъ вряду подъкоморъского и комисарского албо и безъ листовъ, будучи ему на справахъ, вряду его належачих, самъ або черезъ слугъ, подданыхъ своихъ збилъ албо, листы от него отнявъши, содралъ албо возного любъ сторону позвы, листы ести [в оригинале "естли"] примусилъ албо поличковалъ, волосы або бороду ръвалъ и тымъ вряду не учъстилъ, тогды таковый кождый маеть быти о то позванъ на рокъ завитый до вряду земъского албо кгродского, где сторона жалобная похочеть, на перъшие роки. А тамъ за доводомъ слушнымъ маеть навезати возъного совито водле стану его. А за нашу вину на замъку албо дворе поветовым дванадцать недель седЪть у вежи веръхней, а сторону, которую бы при возномъ збито або, яко вышей описано, обельжоно, маеть такъже за слушнымъ доводомъ навезати совито водъле стану, якого будеть, и шкоду возному и стороне, и естли се ей што в тотъ часъ станеть, совито заплатити. Пакъли ж бы конемъ хвосты поурезано альбо поранено, тогды за то виненъ будеть толко коня конемъ навезати и за то седенья не понесеть. А где бы претивная сторона за сказаньемъ суду земского або кгродского седети, навезокъ и шкодъ платити не хотела на часъ, от вряду назначоный, тогды таковый еще в другую совитую заплату навезокъ и шкодъ присужоныхъ для тое противности своее попадеть, што врядъ возному и стороне заразом водлугъ порядъку о отправахъ речей сужоныхъ, нижей постоновеного, на йменью такового отправити маеть. А тое непослушенство его з стороны седенья врядъ земъский або кгродъский, передъ которимъ се то приточить, маеть намъ, г[о]с[по]д[а]ру, ознаймити, а мы, г[о]с[по]д[а]ръ, тому не фолькгуючи, без всякое проволоки и откладанья на инъший часъ, але заразомъ взявъши о томъ от того вряду нашого ведомость через листъ отвороный, такового обвиненого и вряду нашого непослушного маемъ зо всихъ земль паньства нашого казати выволати. А пакли бы хто возного на таковых справахъ, вряду его належачихъ, або сторону, при немь будучую, забилъ, таковый, будучи о то притягненый до суду кгродского и с права поконаный, самъ горъломъ каран, а головщина забитого совито зъ именья его плачона быти маеть. А за нестаньемъ стороны объвиненое вряд в томъ далей поступовати маеть, и мы, г[о]с[по]д[а]ръ, за отосланьемъ врядовымъ заховатисе противъ таковых будемъ водлугъ арътыкуловъ, на судъ кгродский около речей крвавыхъ описаных. Одно жъ за головщину и шкоды такого возного або стороны забитое врядъ заразомъ, скоро позваный не станеть, совитое сказанье и увязанье въ именье такого свовольного и непослушного дати маеть, положивши на листе увяжчомъ еще такъ великий закладъ, яко самое речы скажеть. А гдЪ бы што с тых речей менованыхъ возному або стороне ку зельживости сталосе не от самого пана, до кого бы былъ посланъ, але от слугъ, подданыхъ и от кого колвекъ иного з дому або на именью оного, будь при бытности самого пана в томъ дому або в небытности его, а онъ бы, будучи о то позваным, до того се не зналъ, жебы се то мело стать зъ его росказанья, тогды о томъ черезъ тотъ же врядъ, до которого будеть позвано, росправа маеть быт[ь] вчинена такимъ обычаемъ, яко в той мере о посланьцохъ нашых в розделе первомъ арътыкуле двадцать четвертомъ ест описано.
|
|
|
|
|
|
Артыкулъ 12.
О печати нашой, г[о]с[по]д[а]ръской, земской и тежъ о печатехъ врядовыхъ, которыми што маеть быти печатовано.
Тежъ мы, г[о]с[по]д[а]ръ, даемъ подъ геръбомъ того паньства нашого, великого князства литовъского, "Погонею" печать до кожъдого повету, на которой естъ написани [так!] около геръбу имя того повету. А тую печать писаръ земъский присяжный у себе самъ, а не хъто инъшый, ховати маеть, которою печатью и под тытуломъ нашымъ позвы мають быти печатованы и выдаваны. А иные никоторые листы, выписы и сознанья, кроме только самыхъ позвовъ, тою печатю не маеть [так!] быть печатованы, але будуть печатованые всякие листы с того вряду земъского, судовые выписы и сознанья, листы упоминальные, увяжчие и иные печатьми суд[ь]иною и подъсудъковою, а подъписованы рукою того жъ писара земъского.
Артыкулъ 13.
О книгахъ земъскихъ и кгродскихъ, где мають быти хованы и о местъцу на отправованье судовъ земъскихъ и теж о выдаван[ь]ю, кому потреба укажеть, выписовъ [в оригинале "выпосов"] албо видимусовъ.
Уставуемъ тежъ, хотечи то мети, и приказуемъ, абы в кождом таковомъ повете, где судъ земъский естъ в замъку албо в дворе нашомъ, судья, подъсудокъ и писаръ земъский посполу зъ шляхтою и всими иными станы опатрыли, збудовали таковые местца, где бы завжды книги земъские безпечне от вшелякое пригоды были захованы. Прото воеводове и старостове судовые в кожъдомъ воеводъстве, земли, повете в замъку або дворе нашом судовомъ схованье доброе и варовное поступити имъ на то винни будуть. А где бы таковыхъ схованей не было, тогды на збудованье склепу ку захованью книгъ местъца пристойные в замкох и дворехъ нашыхъ указати и подати и сами жъ таковые воеводове и старостове судовые оное схованье книгъ земъскихъ доброю сторожою подъ кожъдымъ часомъ опатровати мають. А кгды роки отсужоны будуть, тогды по выволанью роковъ мають книги еще немней трехъ дни лежати, при которых мають быти, не от[ъ]еждчаючи, судья, подъсудокъ и писаръ для сознанья, уписован[ь]я и выписовъ бранья, для иныхъ потребъ шляхетъскихъ. А роз[ъ]еждчаючисе, мають иньшие перъвшихъ роковъ книги вложити и заховати въ скриню моцную за трима замъками, отъ [в оригинале "оттъ"] которых одинъ ключъ будеть у судьи, другий у подъсудъка, а третий у писара, и печатьми [в оригинале "печатьти"] своими запечатати мають. Але книги тых одныхъ судовых роковъ, с которых се по отсуженью ихъ будуть роз[ъ]ежъдчать, мають быти у писара земъского, яко врядника присяглого, ажъ до другихъ роков судовыхъ, а то для порадного справованья и начысто переписанья книгъ. А писаръ в томъ часе, межы роковъ переписавъшы тые книги начысто, маеть ихъ на других рокохъ до одное скрини и захованья з судьею и с подъсудком, яко о томъ вышей доложоно, положити и потомъ ихъ не отворати, ажъ весполокъ зъ судьею и с подъсудъкомъ, кгды того потреба укажеть. И вжо такъ завжды толко от роковъ до роковъ, судовне отправуючихъ, писари земъские поветовые мають у себе книги ховати. А кгды трои роки отсужоны будуть, тогъды по отправенью четвертых роковъ вжо тые справы прошлых троихъ роковъ въ одны книги через писара знесены и вязани быти мають. К тому тежъ воеводове и старостове судовые въ кождомъ воеводъстве, земъли и повете местъца пристойные на збудованье домов для отправованья судовъ земскихъ недалеко замковъ и дворовъ наших судовыхъ вряду земскому и шляхте указати и поступити мають. А врядники земъские со въсими станы оного повету будуть винъни, яко тое схованье книгъ судовых у замку албо у дворе, такъ и тотъ домъ судовый збудовати с тыхъ пенезей, яко то особливою уфалою естъ постановено, што за моцно держано быти маеть. Тым же обычаемъ воеводове, старостове судовые книги кгродские в добромъ схованью варовне ховати мають. А кгды который воевода або староста судовый с того свЪта зыйдет, албо если бы есмо которого зъ ихъ с того вряду на иншое воеводство албо староство преложили, тогды врядники их кгродъские або они сами повинъни будут тому старосте, которому оное воеводство або староство дано будеть, вси книги кгродъские в томъ же повете при въеханью его на тотъ вряд передъ шляхътою зараз в целости здати. А выписы або видимусы такъ с тыхъ книгъ перъшихъ воевод и старостъ, яко и кожъдый врядъ с книгъ своих справъ [вариант: "с правъ"] кождому, кому кольвекъ того потреба указывати будеть, без вшелякого затрудненья и проволоки мають давати листы с подписомъ руки писара кгродъского присяглого и с печатми самихъ воеводъ, старостъ або ихъ врядников судовыхъ, наместъника албо подъстаростего и судьи кгродъского.
|
|
|
|
|
|
Артыкулъ 14.
О пересудехъ и паметномъ в ыменьяхъ кн[я]зьскихъ, панъскихъ и земяньскихъ такъ духовного, яко и светъского стану.
Забегаючи затруднен[ь]ю и обътяженью справедливости людское, уставуемъ теж [в оригинале "тежу"] с призволенемъ всихъ становъ, што жъ вси панове рады наши духовные и светъские, кн[я]зи, панове, державцы, тивуны и вси иные врядники наши на врядехъ наших несудовых и тежъ в ыменьяхъ своихъ властныхъ, по тому жъ рицеръство, шляхта и вси обыватели того паньства, великого князства литовъского, и в земляхъ, к нему належачихъ, на именьяхъ своихъ чинечи справедливость шляхъте и инъшимъ подданымъ нашим зъ врядники, бояръми и поддаными своими, мають се заховати сами и ихъ врядники въ бранью пересудовъ и паметного водлугъ тое жъ уставы, врядомъ нашимъ вышей в арътыкуле пятом сего жъ розделу описаное, под тою ж виною на сторону по дванадъцати копъ грошей, о которые вины мають быти сами панове, где бы то сами вделали або з урядъниковъ своихъ справедливости о то не учинили, позываны до вряду нашого земъского на перъвшие роки на завитый рокъ.
Артыкулъ 15.
О бранью вижованого, оглядного и иныхъ доходовъ в дворехъ и имЪньяхъ кн[я]зъскихъ, паньскихъ и земяньскихъ.
Уставуемъ и то, хотечи в порядъку слушномъ мети, ижъ во всем томъ паньстве нашомъ, великомъ князстве литовъскомъ, и въ земляхъ, к нему належачихъ, на всякихъ врядехъ нашихъ, господаръскихъ, несудовыхъ, такъже на именьяхъ кн[я]зъскихъ, паньскихъ и земяньскихъ, духовъныхъ и светъскихъ, вижового, оглядного и от вязней потуремного не маеть быти большей брано, только водлугъ сее уставы нашое, нижей описаное, то естъ вижу на кождую речъ взятому и огледаного битыхъ и ранъныхъ на местцу - грошъ одинъ, а естли где вижъ поедетъ за колко миль, тогды ему помилного на милю по грошу у одну сторону, яко и возному повЪтовому - от выдан[ь]я роты присеги духовнымъ особамъ грошъ, а вижу, на то приданому, грошъ; а от вязней от вшелякого везенья потуремного, поланцужного або поколодного от такового вязня, который бы на горло седел, от шляхтича того, которого статутъ имать позволяетъ, дванадцать грошей, от простого ч[е]л[ове]ка - шесть грошей, а который бы в меньшой вине осажонъ былъ, жебы о горло не шло, от таковыхъ по половицы того брано быти маеть. А платити то маеть тотъ, хто винен в чомъ с права зостанет. А естли бы вязень с права от объжалованья стороны противное вольным былъ вчиненъ, тогды сама тая сторона противная, што его осадить дала, маеть его подъле тое уставы з везенья выкупити. Также где бы которий вязень на смеръть былъ сказанъ, тогды тое потуремное сторона жалобъная будеть винъна заплатити. А плачоно то маеть быти разъ одинъ, кгды въжо остатнимъ разомъ вязень або на волность, або на смеръть з везенья выходить. И для того вжо сторожа около всякого вязня маеть быти не того, хто его дасть осадити, але того пана, чый будеть слуга, бояринъ або подданый. Толко где бы лезный неоселый ч[е]л[о]в[е]къ, то естъ дому под тымъ паномъ не маючый, былъ осажонъ, сторона жалобная на день на страву ему по чотиры пенези маеть давати. А естли бы хто з везенья вязня упустилъ, о томъ за припозваньемъ до права належного водлугъ описаня сего статуту маеть быти сужоно водлугъ арътыкулу, в семъ же розделе о врядехъ нашихъ кгродскихъ в таковой речи описаного, ищучи того на томъ, кому вязень поданъ будеть. А не всхочет ли панъ або врядникъ его того вязня до везенья своего приняти, тогды маеть сторону с тымъ вязнемъ на врядъ нашъ судовый пустити, и там вжо на томъ уряде з него справедъливость чинена быти маеть, кгды жъ владзу свою за непринятьемъ вязня до везенья упустилъ. А што будеть от вряду с права сказано, то панъ або врядникъ его за декретомъ врядовымъ на маетъности того вязня рухомой отправити маеть. А естли маетъности рухомое такъ много не будеть, тогды самъ в томъ маеть быти стороне выданъ на выробъ, яко о томъ в ынъшомъ арътыкуле ест доложоно, звлаща где бы горъла не заслужилъ.
|
|
|
Артыкулъ 16.
|
|
|
