Чюдо преподобнаго Александра о исцелевшем юноше беснующемся

Ино чюдо хощу поведати преподобнаго Александра въ граде Каргополе человекъ никы именем Александръ древоделатель иже нашею речию зовется плотникъ, яко многыми знаемь бе ремесла ради. Бяше же сынъ у него имянем Иванъ, юну же ему еще сущу и случися болезнь ему тяжка лукавымъ духомъ обладану быти ему и мучиму. Егда же поразит его нечисты духъ, тогда падаетъ на змелю и пены тещитъ и оцепневаеть, иногда убо неподобнаа дея, не могы глаголати отинюд, иногда же нелепаа глаголаше, якоже немощно слышати и на много время зле вяжем бываше крепко и растерзаемъ бегаше скитаяся в пустыни и по стремнимнинам убивашеся и паки обретаемъ бываше и многими едва при//влачим бяше в дом свои и многажды же ему падающу же убиватися от зелнаго мучениа находящаго беса и тако на много время сему бывающу видевше же родителие его глаголаху, яко от Божиа попущениа бысть се грехъ ради нашихъ умилно бе зрение и ужастно видение, доброденъ бе отрокъ образомъ и всем любимъ и писанию божественых книгъ измлада извыче и пению осмогласному научився и красну песнь Господеви пояше. И егда же приидеть тяжкы тои недугъ нань, тогда же от диавольска деиства во единъ часъ всему изменение бысть, видение страшно и ужаса исполнено, лице развращено, очи искревлене, благолепие отпаде и вся красота исчезе, гласу пременение бысть, иногда, яко скотъ, рыкая, иногда же яко песъ лаяше и всем нелепая глаголаше и всехъ биаше и никого же знаяше// и никого же бояся. Родители же его, видевше такое мучение чада своего, недоумешеся, что сотворити и много же къ святымъ молебнаа повелевше пети малу ползу обретше и пакы приате от Бога добръ помыслъ поянуша чюдеса преподобнаго Александра началника Ошевеньского монастыря и начаша его призывати его в молитвах своихъ к Господу глаголюще: «Господи, помози чаду нашему, яко зле бесится молитвъ ради преподобнаго отца Александра». И абие в том часе отроку Ивану облегчаше ему недугъ и нача смыслено глаголати и со слезами моляшеся, глаголюще: «Господи, помилуи мя, яко зле стражу. Можеши мя помиловати, аще восхощещи». И потомъ вкуси брашна и бысть радость родителем его и изыде отрокъ из дому своего поведашеся яко негде ко своим сродником на орудие идяше и прииде ему помыслъ идти во обитель// у чюдотворцова гроба Александрова, яко да тамо прикосновениемъ ракы святаго до конца получит исцеление и пути касается и бысть шествие его скорее коннаго течениа, тако Богу помогающу ему. И приходить во обитель и вшед во притворъ припадаеть ко гробу святаго и облобызаеть раку его, и молит прилежно, и слезит тепле, сице глаголаше: «О великы чюдотворче, преподобне Александре, похвала нашея страны северныя Онежскыя земли, помилуи мя беснующагося, да и азъ буду проповедетель чюдесем твоимъ и плакася на долгъ часъ и потомъ приходить ко игумену и молит игумена, дабы молбы сотворилъ о нем. Игумен же скоро шед, молебная съвершаеть и благослови его и посаетъ его к келарю, да напитаетъ его и дасть ему место на почивание и приставника на б//режение. И нощи же приспевше, тако же много зла пострада от бесовъ, многыми бо страшными виды являхуся ему. Отроку же от таковых мучиму и яко в тонокъ сонъ сведенъ бысть и видит преподобнаго Александра в светлыхъ ризах пришедша и абие о видениа святаго без вести быша бесове и възревъ преподобныи на отрока и рече ему: «Аще хощеши, чадо, до конца исцеление получити, то постригыся в нашем монастыри и буди инокъ, и тако исцелееши». И по семъ невидимъ бысть. И възбнувъ же юноша от видениа и никого же виде, токмо позна себе здрава от болезни и размышляше о видение: «Аще изыду от обители, то в тая же или горша сих впаду и буду непотребенъ никому же, то лучьше мне быти инокомъ и здраву сущу». И пребысть тако мало время и пострижеся и нареченъ // бысть Исаиа и оттоле бысть здравъ, яко николиже что пострадавъ и по томъ же пребысть во обители неколико время и прочее отиде пребываше в великых обителех, бысть клирик искусенъ инокъ и мнозими знаемъ бе, иногда же в пустынях пребывая, славя Бога и всюду проповедая чюдеса преподобнаго Александра.

И се же да поведано будет некы старець Игнатеи имянем исповеда ми сам о себе. «Живущу ми, -- рече, -- в мире, и нападоша на мя болезни тяжкы и недугы различнии и скорби многы». И помысли и рече в себе: «Что се слышу на всякъ день въ псалме глаголемаа: “Обратитеся, сынове человечестии, яко тысяща лет пред очима твоима, яко день вчерашнии”». Внятъ же он тому словеси присовокупи же и другое к тому, иже Господь рече въ святом Евангелии: «Небо и земля ми//моидет, а словеса же моя не мимоидут». Он же воспомяну своя грехы и смертны часъ и горкое разлучение души от тела и страшныи, грозныи суд и вечныа оны бесконечныа мукы и черви неусыпающая и собравъ малая своя имениа и прииде в монастырь и приатъ иноческы образъ и по четыредесяти же днехъ закона монастырьскаго посланъ бытсь от настоятеля служити в поварню на братию тружатися и елико мога своею службо печашеся. Богу попущающу грехъ ради нашихъ и завистию диавольскою напрасно оклеветанъ бысть тако Игнатеи чернець новоначальны непотребенъ есть в таковои службе монастырю тщету творит, раздавает от вещеи монастырьскых за монастырь от хлеба и от рыбы, яже предана суть в руце его. И бысть роптание в бра//тии его ради и взяша же его от службы и всадиша в темницу и путы железныи возложиша нань на руце и на нозе и пребысть в темнице тои время немало и тесно бе ему путо на деснеи руце и начатъ молитися, глаголя: «Господи Боже мои, создателю всего мира, ты, отпущая неповинныя, разрешая окованныя и от узвъ избавля связанныя и от пленъ <нрзб> ты вся веси, яко клевета сиа злаа напрасно наиде на мя, неповинну бо ми сущу таковаго осужениа, но прежних ради грех моихъ мала сиа мне бысть. Ныне, Господи, даи же деснеи моеи руце малу ослабу, яко тесно есть путо и велми скорблю о сем же наипаче стюжаюси, якоже ми образа создавшаго тобою, Господи мои, не могу прекрестити и много// молихся и слезы многы излиахъ и многыхъ святых призывах на помощь, не бысть ему помощи. Вспонухъ же онъ преподобнаго отца Александра началника и рече: «О преподобны отче Александръ, слышу чюдеса твоя многа, но неверно мню, понеже маловеренъ есмь, того ради не могу от слышаниа уверитися, аще на мне не исполниши от Бога дарованныя ти чюдеса благодати. Помилуи мя маловернаго, да азъ начну веровати чюдесемъ твоимъ». И ятся шуицею за десную руку и за путо железное и в томъ часе распространися путо и слезе с рукы его десныя. Он же начатъ право креститися и бысть от того часа пространно путо возлагах и снимах славя Бога и дивяся неизглаголанне благодати Божии и чюдесем преподобнаго Александра и егда же кто от братии приидеть по//сетити его или страж ядь принесет, тогда онъ путо возлагах на руку свою, а егда же отидут, тогда снимах его. Он же тогда скрых чюдо, не поведах никому же, бояхся, да не ркут роветници и невегласи, яко волхвъ есть, яко и поты железныя не удержатъ его, того ради потаих чюдо, да не спону сотворять милости Божии и чюдесем преподобнаго. Мы же сиа слышах с великым испытаниемъ вопрошахъ. Тои же Игнатеи инокъ от истинны исповедая, сказа им вся по ряду. Мы же сия вьственно написах во славу Христу Богу и преподобному отцу нашему Александру чюдотворцу угоднику Божию.

Чюдо о некоем юноше, исцелевшем во обители святаго.

Некы юноша Михаило имянем Пахомовъ сынъ, жилище имея недалече от обители святаго, верхъ тоя же Чюрьюгы рекы родителема же его у//мершима, он же остася младъ, еще же и нищетою одержим и прииде в монастырь и вдася служити на время и приятъ бысть. И пребывающу ему неколико время, и случися ему болезнь тяшка вреду велику быти на нозе его деснеи, и недугом сим зле одержим бе язвы согнитиемъ и отеку же велику сущу на нозе его и на много время трудно боляше ниже пищи, ни сну причаститися, ни со одра востати. И тако стражушу ему два месяца, Богу тако изволившу и попущающу грех ради наших и от тяшкаго того недуга скорчися нога его. Он же не веды, что сотворити. Благы же Богъ, иже праведныхъ любя, а грешных милуяи, всехъ зовыи къ спасению, приспевшу же Николы чюдотворца пренесению мощем его в навечерии же праздни того зелне ему болящу и велми стражущу и начатъ молитися со слезами къ Господу Богу и Пречистеи Его Матери// и призывая на молитву великого чюдотворца Николу и святаго старца преподобнаго Александра, и рече в себе: «О колика исцелениа Богъ творитъ угодникомъ своим Алекснадромъ». И начатъ молитися и глаголати: «Святы Александръ, помози ми, избави мя от болезни сея. Вем бо, отче, преподобныи, яко егоже просиши у Бога, то подати тебе имать и не презри мене в болезни сеи». Сиа же и ина многа изрече от жалости сердца своего и со многым умилениемъ и всю нощь без сна пребывая от лютаго недуга зле мучим. Времяни же приспевше заутренни и клепанию и всии же людие поидоша к пению. Он же единъ остася лежа ничто же ино рече, токмо сие: «Святы Александр, избави мя от болезни сея». И аби легчае ему бысть и в тои часъ от тяшкаго оного недуга усну твердо. Скоры же послушатель блаженны Алексанръ// приходить въ священническою одежю одеянъ и рече боляшему юноше: «Что спиши, востани и иди въ притворъ и приложися у гроба Александрова и пакы къ заутрении иди и помолися Николе чюдотворцу и мене призываи на помощь, надеевеся на Бога, всяко исцелееши». Болны же виде старца святолепна и умилна образом и не сме вопросити: «Ты кто еси или како имянуешися?» Но токмо отвеща: «Отче, хотелъ бых востати, но не могу, понеже нога моя деснаа велми болезнена язвою съгнитиемъ и отеку велику сущу и того ради скорчися нога моя». Преподобны же приступивъ, взятъ рукою своею за перьсты болною ногу его и протягну еа и простреся нога его и бысть здрава, яко и другаа. Болны же согну ногу свою, святы же протяже ю. Се же бысть и третицею тако. Святы же рече ему: «Се здравъ еси, ктому не съгрешаи. // И яко же преже рех ти, иди къ гробу моему и приложися