 |
Канон. Творение кир Андрея Критскаго, глас 6
|
|
|
|
Канон. Творение кир Андрея Критскаго, глас 6
Песнь 1. Ирмо́ с
Помощник и Покровитель бысть мне во спасение, Се ми есть Бог и прославлю и, Бог Отца моего, и вознесу и. Славно бо прославися.
Ведомо же буди. Егда един лик поет, тогда другии творит поклоны, благочиния ради. Запеваем к стихом Запев: Слава Тебе Боже наш, слава Тебе.
Запев. Откуду начну плакати страстнаго ми жития дел; кое ли начало положу Христе нынешняго рыдания; но яко милосерд, даждь ми слезы умиления.
Запев. Гряди, окаянная душе, с плотию своею, Зиждителю всех исповеждься и останися прочее прежняго безсловесия, и принеси Богу в покаянии слезы.
Запев. Первозданнаго Адама преступлению поревновах, познахся обнажен от Бога, и присносущнаго Царствия и пищи, грех ради моих.
Запев. В Еввы место чувьственыя, мысленая ми бысть Евва: иже в плоти страстныя помыслы, показуя сладкая, и вкушаю присно горкаго падения.
Запев. Достойно из Едема изгнан бысть Адам, яко не сохрани едину заповедь, Твою Спасе. Аз же что сотворю, отметая всегда животная Твоя словеса.
Запев. Каиново прешед убийство, изволением бых убиица. Совестию душевною, оживив плоть, и воевав наню лукавными делы.
Запев. Авелеве Исусе неуподобихся правде, дара Тебе приятна не принесох когда ни деяния Божествена, ни жертву чисту, ни жития непорочна.
Запев. Яко Каин и мы душе окаянная, всех зиждителю, деяния сквернена и жертву порочну, и не потребно житие, принесохома вкупе, темже и осудихомася.
Запев. Брение Зиждитель живо создав, вложил ми еси плоть и кости и дыхание и жизнь. Но о Творче мой. И Избавителю мой и Судие, кающагося приими мя.
Запев. Увы мне окаянная душе, что уподобися первей Евве; виде бо зле, и уязвися горце. И прикоснуся древу, и вкуси дерзостне без словесныя снеди.
|
|
|
Запев. Исповедаю Ти Спасе грехи, яже соделах, души и тела моего язвы, яже внутрь убийственнии помысли, разбойнически намя возложиша.
Запев. Аще и согреших Спасе, но вем яко Человеколюбец еси, биеши милостивне, и милуеши тепле. Слезяща зриши, и противу течеши яко Отец призывая блуднаго.
Запев. От юности Христе, заповеди Твоя преступих, всестрастно небрегии, унынием преидох житие мое. Темже зову тебе Спасе, поне наконец спаси мя.
Запев. Повержена мя Спасе пред враты Твоими, поне на старость не отрини мене во ад тща. Но прежде конца яко Человеколюбец, даруй ми грехопадении оставление.
Запев. Богатьство мое Спасе изнурих блудом, пуст есмь плодов благочестивых. Алчен же зову, Отче щедрот, предварив Ты мя ущедри.
Запев. Иже в разбойники впадыи аз есмь помышленьми моими, весь от них уязвихся ныне, и исполнихся ран. Но сам ми представ Христе Спасе исцели.
Запев. Священник мя предвидев мимо иде, и левит видя в лютых, нага презре. Но иже от Марии восиявыи Исусе, Ты представ ущедри мя.
Запев. Агньче Божии, вземляи грехи всех, возми бремя от мене тяжкое греховное. И яко Милосерд, даждь ми слезы умиления.
Запев. Не гнушайся мене Спасе, и не отрини припадающа Ти. Возми бремя от мене тяжкое греховное, и яко Милосерд, даждь ми слезы умиления.
Запев. Тебе припадаю Боже, согреших очисти мя. Возми бремя от мене тяжкое греховное, и яко Милосерд, даждь ми слезы умиления.
Запев. Покаянию время, прихожду к Тебе содетелю мой, возми бремя от мене тяжкое греховное, и яко Благоутробен, даждь слезы умиления.
Запев. Вольная Спасе и невольная согрешения моя, явленная и сокровенная, ведомая и неведомая, вся простив яко Бог, очисти и спаси мя.
Запев. Гряди приими душе моя самыи час и день, егда Бог яве приидет, и рыдай и плачися обрестися чиста, в час испытания.
Запев. Ужасает мя и страшит огнь он геенскии, и червь горкии, и скрежет зубом, но ослаби ми и пощади и стоянию мя Христе избранных твоих причти.
|
|
|
Егда же приспеет стих Марии. И глаголемъ к стиху тому запев: Преподобная мати Мá рия моли Бога о нас. Ты ми даждь светозарную благодать, от Божественаго сыше промышления, избежати страстей омрачения, и пети усердно твоего жития, красная Марие поведания.
Запев Мá рии. Преклоншися Христовым Божественым законом, к сему приступи, сладострастей нечистых стремления оставивши, и всяку добродетель Марие исправльши.
Слава. Пресущная Тро́ ице, яже во Единьстве покланяемая, возьми бремя от мене тяжкое греховное, и яко милосерд, даждь ми слезы умиления.
И ныне. Богородичен. Богородице Надежда и Предстателнице всем поющим Тя, возьми бремя от мене тяжкое греховное, и яко Владычице Чистая, кающася приими мя.
Покрываем же всякую песнь, ирмосом.
Песнь 2. Ирмо́ с
Вонми небо и возглаголю, и воспою Христа, иже от Девы плотию пришедшаго.
Запев. Вонми небо и возглаголю земле внушай гласа кающася к Богу и воспевающа Его.
Запев. Вонми ми Боже яко щедр милостивным си оком, и приими мое теплое исповедание.
Запев. Согреших паче всех человек, един согреших Тебе. но ущедри яко Бог творение Свое.
Запев. Буря мя злых обдержит Милосерде Господи, но яко Петру и мне руку простри.
Запев. Слезы якоже блудница щедре и аз предлагаю, очисти мя Спасе милосердием си.
Запев. Оскверних плоти моея ризу, и окалях еже по образу Спасе и по подобию.
Запев. Омрачих душевную красоту страстными сластьми, и весь ум кал сотворих.
Запев. Раздрах ныне одежду мою первую юже ми истка Зиждитель исперва, и оттуду лежю наг.
Запев. Облекохся в раздранную ризу юже истка ми змий советом, и стыжюся.
Запев. Возрех на садовную красоту, и прельстихся умом. тем же лежю наг, и срамляюся.
Запев. Погубих первозданную доброту, и благолепие мое, и ныне лежю наг и срамляюся.
Запев. Коваху на хребте моем вси начальницы страстнии, одолеюще мя беззаконием своим.
Запев. Сшиваше кожныя ризы грех, обнажив мя первыя боготканныя одежды.
Запев. Обложен есмь одеянием студа, якоже листвие смоковное, во обличение моих самовольных страстей.
Запев. Одеяхся в срамную ризу, и окровавленую студно, течением страстнаго и любосластнаго живота.
|
|
|
Запев. Впадох в страстную пагубу, и в вещественую тлю, и от толе и до ныне враг ми досаждает.
Запев. Любовещно и любостяжаемое житие невоздержанием Спасе предпочет, ныне тяжким бременем обложен есмь.
Запев. Украсих плотьскаго образа скверными помыслы, различным одеянием, и осуждаюся.
Запев. Внешним прилежно, благоукрашением единем попекохся, внутренюю презрев благообразную сень.
Запев. Вообразив мое страстное безобразие, любосластными стремленьми, погубих умную красоту.
Запев. Погребох перваго образа доброту Спасе страстьми, якоже иногда драхму, взыскав обрящи.
Запев. Согреших якоже блудница вопию Ти, един согреших Тебе, яко миро приими Спасе и моя слезы.
Запев. Поползохся яко Давыд блудно, и осквернихся. Но омый мене Спасе слезами.
Запев. Очисти яко мытарь вопию Ти, Спасе очисти мя. Никтоже бо от сущих из Адама, яко аз согрешил есть к Тебе.
Запев. Ни слез ни покаяния имам ни умиления. Но сам ми Спасе сия, яко Бог даруй.
Запев. Дверь Твою не затвори ми тогда Господи, Господи, но отверзи ми сию кающумися.
Запев. Человеколюбче хотяи всем спастися, Ты воззови мя и приими яко благ кающумися.
Богородичен. Внуши воздыхание души моея, и очию моею приими каплю Спасе, и спаси мя.
Ин, ирмос. Видите видите, яко Аз есмь Бог, иже манну одождивыи, и воду искамене источив древле впустыни людем своим, десницею единою, и крепостию моею.
Запев. Видите видите, яко Аз есмь Бог. Внушай душе моя Господу вопиющу, и останися прежняго греха, и убойся яко истязателя, и яко Судии и Бога.
Запев. Кому уподобися многогрешная душе; токмо первому Каину, и Ламеху оному. Камением побивши тело злодействы, и убивши ум скотскими стремленьми.
Запев. Всех иже прежде закона претекши о Душе. Сифу не уподобися, ни Еносу оному, ни Еноха преставлению, ни Ною. Но явилася еси нища праведных жизни.
Запев. Едина разверзла еси, хляби гнева Бога твоего душе моя, и потопила еси плоть всю якоже землю и деяние и жизнь, и пребыла еси кроме спасеннаго ковчега.
|
|
|
Запев. Мужа убих рече в язву мне, и юношу в струп, Ламех рыдая вопияше. Тыже не трепещеши о душе моя, и не боишися, плоть и ум осквернивши.
Запев. О како поревновах Ламеху, первому убийце. Душю яко мужа, ум яко юношу, яко брата же ми тело убив, яко Каин убийца, безсловесными стремленьми.
Запев. Столп умудрила еси создати, о душе, и утвержение водрузити своими похотьми, аще не бы зиждитель удержал советы твоя, и низвергл на землю ухищрения твоя.
Запев. Уязвихся уранихся, се суть стрелы вражия, яже ми уязвиша душю и тело, се язвы и струпи и гноения, и омрачения вопиют, и раны самоволных страстей.
Запев. Одожди Господь от Господа огнь геенскии вжегла еси, внемже хощеши душе сожжена быти.
Запев. Разумейте и видите, яко Аз есмь Бог, истязаи сердца, испытаяи мысли, обличаяи дела, и попаляяи грехи, и судяи сиру и смирену, и нищу.
Слава. Безначальная Несозданная Троице, и Нераздельная Единице, кающася приими мя, согрешающа спаси. Твое есмь создание, не презри, но пощади и избави огненаго осуждения.
Богородичен. Чистая Владычице Богородительнице, упование к тебе прибегающим, и пристанище в бури, Милостиваго и Зиждителя Сына твоего умоли, помиловати и мене, молитвами твоими.
Сию песнь вторую, покрываем, другим ирмосом. Видите видите.
|
|
|
