 |
Песнь 9 Ирмо́с
|
|
|
|
Безсеменна зачатия, Рожество несказанно, Матере безмужныя нетленно рождение. Божие бо рожество, обновляет естество. Темже Тя вси родове, яко Богоневестную Матерь, православно величаем.
Запев. Ум острупися, тело оболезнися. Недугует дух, слово изнеможе. Житие умертвися, конец при дверех. Темже моя окаянная душе, что сотвориши, егда приидет Судия испытати твоя.
Запев. Моисеово принесох ти душе, мирское бытие, и от того все заветное Писание, поведующее тебе, праведных. И неправедных. Ихже вторым о душе уподобилася еси, а не первым к Богу согрешивши.
Запев. Закон изнеможе, празднует Евангелие, писание же всяко от тебе небрежено бысть. Пророцы изнемогоша, и все праведное слово. Струпи твои душе умножишася, не сущу врачю исцеляющему тя.
Запев. Новаго приведох ти Писания притчи, возводяща тя ко умилению. Праведным убо поревнуй, грешных же отвращайся. И умоли Христа, молитвами же и постом и чистотою и говением.
Запев. Христос вочеловечився призва к покаянию разбойники и блудницы. Душе покайся, дверь отверзеся уже Царствия, и предвосхищают е, фарисеи и мытари, и блудницы покаянием.
Запев. Христос вочеловечився, плотию приобщив ми ся, и вся елика суть естеству, хотением исполни кроме греха. Подобие тебе о душе и образ, предпоказуя Своего величества.
Запев. Христос волхвы спасе, пастыри призва, младенец множество показа мученики. Старцы прослави, и старыя вдовицы. Ихже непоревновала еси душе, нидеянием нижитию. Но горе тебе, егда хощеши судитися.
Запев. Постився Господь дний четыредесяте в пустыни, последи взалка, показуя человечество. Душе не унывай, аще ти приложится враг, молитвами же и постом от ногу да отразится.
Запев. Христос искушаем бываше, диявол искушаше Его, показуя камение да хлебы будут. На гору возведе, видети царствия миру в часе временне. Убойся о душе ловления. Трезвися молися на всяк час к Богу.
|
|
|
Запев. Горлица пустынелюбная, глас вопиющаго возгласи. Христов светилник, проповедуя покаяние. Ирод беззаконновав, со Иродиядою. Блюди душе моя, да не угрязнеши беззаконными сетьми. Но облобызай покаяние.
Запев. В пустыню вселився благодати Предтеча, Июдея вся и Самария слышаще течаху, и исповедаху согрешения своя, крещающеся душе моя. Имже ты непоревновала еси никогда же.
Запев. Брак убо честен и ложе нескверно: обоя Христос прежде благослови, плотию ядыи вшед на брак, воду в вино сотворяя, и показуя первое чюдо, да ты изменишися о душе моя.
Запев. Разслабленаго стягну Христос, одр вземша. И юношю мертва воздвиже, вдовича сына. И сотнича отрока, и самаряныни явися. Иже в дусе службу, тебе душе предь живописал есть.
Запев. Кровоточивую исцели, прикосновением края ризы Господь. Прокаженныя очисти. Слепыя и хромыя, просветив исправи. Глухия же и немыя, и ничащия низу исцели словом, да ты спасешися окаянная душе.
Запев. Недуги исцеляя, нищим благовествоваше Христос, словом вредных уврачева. С мытари ядяше, со грешники беседоваше. И Аировы дщере, пред умершую душу возврати, прикосновением руки.
Запев. Мытарь спасашеся, и блудница целомудруяше: и фарисей хваляся осуждашеся. Ов бо убо очисти мя, ова же помилуй мя. Сей же величашеся вопия, Боже благодарю Тя, и прочия безумныя глаголы.
Запев. Закхей мытарь бе, но обаче спасеся, и фарисей Симон соблажняшеся. И блудница приимаше оставлению разрешение, от имущаго власть, оставляти грехи, яже душе потщися прияти.
Запев. Блуднице о страстная душе моя непоревновала еси. Яже приимши мира сткляницу, со слезами помаза нозе Спасове, отерши власы, древних согрешении рукописание раздирающаго ей.
Запев. Грады, имже даде Христос Евангелие, душе моя уведела еси, како прокляты быша; убойся притчи, да не будеши якоже они, ихже содомляном Владыка уподоби, и даже до ада осудил есть.
|
|
|
Запев. Да не горши о душе моя явишися от чаянием, ханаанынину веру слышавши, еяже ради дщи словом Божиим исцеле. Сыне Давыдов, спаси и мене, возопий из глубины сердца, якоже она иногда.
Запев. Умилосердися спаси мя, Сыне Давыдов помилуй, иже беснующихся словом исцеливыи. Глас же милостивен, якоже разбойнику и мне изорцы: аминь глаголю тебе, со Мною будеши в раи, егда прииду во славе Моей.
Запев. Разбойник хуляше Тя, разбойник богословяше Тя. Оба бо на кресте с Тобою висяста. Но о Многомилостиве, с верным ти разбойником познавшим Тя Бога, и мне отверзи дверь, небеснаго Царствия Твоего.
Запев. Тварь сотерзашеся распинаема Тя зрящи. Горы и камение, страхом распадахуся. И земля трясашеся, и ад обнажашеся. И померче свет водне, зря Тя Исусе, пригвождена плотию.
Запев. Достойны покаяния плоды, не истяжи от мене. Ибо крепость моя во мне оскуде. Сердце ми даруй присно сокрушено, нищету же духовную. Да сияти принесу яко жертву приятну Едине Спасе.
Запев. Судие мой, и ведетелю мой, хотяи паки приити со ангелы, судити миру всему. Милостивным си оком, тогда видев мя пощади, и ущедри Спасе, иже паче всякаго естества человеческа согрешивша.
Андрею. Запев: Святителю Христов Андрее моли Бога о нас. Ин запев: Преподобне Отче Андрее моли Бога о нас. Андрее честныи, и отче преблаженныи, пастырю Критскии, не престай моляся о поющих тя. Да избавимся вси гнева и скорби и тли, и прегрешении и бед, иже верою почитающии твою память (дважды).
Марии. Удивила еси всех странным житием своим, ангелом чины, и человеком соборы, не веществено поживши, и естество прешедши. Имже яко не вещественама ногама вшедши Марие Иордан прешла еси.
Марии. Умоли Зиждителя о восхваляющих тя, преподобная мати, избавитися озлоблении и скорбей, окрест востающих. Да избавимся от напастей: и возвеличим непрестанно, прославльшаго тя Господа.
Слава. Троице Единосущная Единице Трисоставная, Тя воспеваем, Отца славяще, Сына величающе, и Духу поклоняющеся, единому Естеству, воистину Богу. Жизнь же и живущее Царство безконечное.
Богородичен. Бога Едина родила еси, и едина девою пребывши. О странному рожеству: о странному зачатию. Зачатие безсеменно и Рожество выше естества. Но о Богоневесто чистая, соблюди стадо Сына твоего, еже стяжа.
|
|
|
