 |
Молитва от сердоболи. Молитвы от нечистых духов. Молитва заклинательная
|
|
|
|
Молитва от сердоболи
«Боже великий, Господи, Исусе Христе, Сыне Божий, иже еси разрешил по твоему смотрению, иже суть были во гробех от всех век. Разреши, Господи, болезнь сию сердечную рабу своему (имя) всегда и ныне, и присно, и во веки веком. Аминь».
Молитвы от нечистых духов
«Боже вечный, избави нас от пленения дияволя, изми раба твоего (имя) от всякаго действа духов нечистых, – и им бесом отступити от души и тела от раба твоего (имя), и да не пребудут, ниже таятся в нем, или на него нападающи, но да отбежит именем твоим единороднаго ти Сына, Господа нашего, Исуса Христа, и животворящаго Креста, и Святаго твоего и животворящаго Духа от создания рук твоих, да очистится от всякаго диявольскаго действия, навета, преподобне и праведне, и благочестне поживет, сподобляем пречистых и животворящих таин, единороднаго ти Сына и Господа Бога нашего, Исуса Христа, с нимже благословен еси и препрославлен, с пресвятым и благим, и животворящим ти Духом, – всегда, ныне и присно, и во веки веком. Аминь».
* * *
«Да отбегнут и отступят от дому сего и от места сего и яже вхождении всяком путном и путешествии, в ядении и питии, от раба Божия (имя) – всякаго диявольскаго обстояния и чародеяния волшебная действа окровлением молитвы и воды сея окроплением исчезните вси диявольския силы во имя Отца и Сына, и Святаго Духа. Аминь».
Молитва заклинательная
" Заклинаю тя, гордыни и всякой злобы, лукавства же и отступства изобретателю и начальниче, диаволе, превеликим, предивным, страшным именем единаго, в Троице славимаго и поклоняемаго Отца и Сына, и Святаго Духа, небо и землю и вся, яже на них, видимая и невидимая, и тебе, добра и свята, от небытия сотворшаго и извергшаго тя и всех споспешников твоих злоб, нечистых духов, с небес, узами мрака связавши их. Убойся сего, осужденниче, и скоро изыди от создания сего!
|
|
|
Заклинаю тя, вселукавый враже человеческаго рода, древним змием, превеликим и страшным именем Господа нашего, Иисуса Христа, ему же всяко колено небесных и земных, и преисподних с трепетом покланяется. Убойся, проклятый низверженниче, изыди, устранися, отъиди от создания сего!
Заклинаю тя и запрещаю ти спасительным воплощением Господа нашего, Иисуса Христа, и преславным его от приснодевы Марии рождеством, имже ключи девы невредимы, целы сохрани. Убойся сего, истины сопротивниче, от создания сего!
Заклинаю тебе, всех злых искусителю, плотию осмодневною обрезавшимся Господем и четыредесятим днем с двою материю во Иерусалиме приведенным, и на обьятиях праведнаго Симеона возлегшим, и дванадесятолетняго возрастом сый возшедшим во Иерусалим, и посреде учителей сшедшим и разумом своим Божественным и ответы предивными всех послущих удививый. Убойся сего, отступниче мерзкий, скоро изыди.
Заклинаю тя, скверный демоне, Господем, во Иордане плотию крестившимся, и Духом Святым, во образе голубином сошедшим нань и гласом Отчим с небесе бывшим: «Ты еси сын мой возлюбленный, в Тебе благоволих! » Убойся сего, безстудный лестче, и отъиди, и ктому не возвратися!
Заклинаю тя, погибельный душе, четыредесять дней и четыредесять нощей постившимся и твое искушение, диаволе, победившим; рекъ: «не искусиши Господа Бога твоего! » Убойся сего, всякия лжи отче, и абие от создании сего устранися!
Заклинаю тя, диаволе, Богом воплощенным, на земли явившимся и с человеки пожившим, неизщетнаго благодеяния сотворшим и путь спасения мирови показавшим, и повеления спасительныя давшим, и бесы словом прогнавшим, и различные недуги исцелившим. Се, убойся сего, адский вселукавый смотче, вострепещи, устранися!
|
|
|
Заклинаю тебе, адский, всепагубный льве, прокаженныя очистившим, слепыя прозрети, немыя глаголати, глухия слышати, хромыя ходити, разслабленныя возстати сотворшим и мертвыя воскресившим. Убойся сего, исконный человекоубийца, диаволе, и скоро с трепетом бежи!
Заклинаю тя, прегордый лукавства рачителю, смирение нам показавшим в низложение твоея высокия гордыни умовением ног святым своим апостолом. Убойся сего, гордынею вознесыйся и до ада низвержением смиривыйся, и абие изыди и бежи!
Заклинаю тя, всякаго сороства и немилости исполненный мучителю, на тайной своей вечери преестественно существо хлеба в тело свое пречистое и существо вина в кровь свою пречистую претворившим и верным своим в снедь и питие в оставление грехов подавшим и сие творити в свое воспоминание повелевшим. Убойся Того, всех ересей изобретателю и нечестия всякаго кореню, диаволе, к ничтоже умедли, но абие изыди, устранися!
Заклинаю тя, всех грехов и погибели источниче, безкровною, страшною, животворящею жертвою тела и крове Господа нашего Иисуса Христа, еюже вернии спасаются, ты же и погибельная твой сила испражняется. Убойся сего, непокаятельная злоба, мерзкий нечистый душе, и бежи от создания сего!
Заклинаю тя, зависти глубина преестественная, в вертограде молитвою Господнею и каплями крове, яко пот от пречистаго тела его на землю капнувшими. Убойся сих, доброненавистниче и погибели сыне, и скоро изыди!
Заклинаю тя, прелести всякия источниче, изволившим связан, биен и веден к Анне и Каиафе, заушен же и оплеван, и люто мучим в нощь быти, и Пилату представшим, и от него много истязанным мучимый, и у столпа нагопривязанным, и битым, и в хламиду на ругание облеченным, венцем терновым обложенным, тростию по главе биенным, от Ирода укоренным и поруганным, и на смерть от Пилата осужденным. Убойся сего, древняя злоба, всякия муки достойный, и его лютых болезней, и страшных, вам же спасенных мук, имиже твою немощную силу сокруши, и с трепетом в бегство претворися!
Заклинаю тя, с небесе спадшаго, Деннице, на смерть ведомым Господем и крест свой понесшим, и многая уничижения, и раны тогда от верующих его спасения нашего погибели же тогда от верующих его ради претерпевших!
|
|
|
Заклинаю тя, безстудный оболгатель и клеветниче, наго на кресте посреде двою разбойнику пригвожденным, оцтом и желчию напоенным и лютыми и неизглаголанными болезнми Его, яже лютыми на кресте нашего ради спасения, осуждения же твоего, диаволе, претерпе; и святыми Его пречистыя крове нещадными излиянии. Убойся сих, Божий враже и лжи, и лукавства источниче, ужаснися и абие изыди!
Заклинаю тя, безстудный оболгателю и клеветниче, седмию словес Господних на кресте на спасение наше, на твою вечную погибель изреченными, и животворною его смертию, еюже мы ожихом, ты же умерщвлен еси. Убойся сего, всякия благости вечно осужденниче, возстени и скоро исчезни от создания сего!
Заклинаю тя, всякия правды противниче, Тем, егоже солнце на кресте висяща, видевши, померче и земля вострепета, и завеса церковная раздрася, и его же силою камение распадошася и гробы отверзошася, и телеса усопших святых восташа и, по воскресении Его, внидоша во святый град, Иерусалим, и явишася многим. Убойся сего, суровый мучителю и лукавства бездно, и скоро изыди, устранися от создания сего.
Заклинаю тя, развратниче вселукавый, прободением пречистаго ребра Господня, из негоже истече кровь и вода в наше спасение и обновление, в твое же конечное сотрение и силы твоея сокрушение. Убойся силы сего огня вечнаго вещество и скоро устранися!
Заклинаю тя, безчиния всякаго и раздорства изобретателю, Боготелесным Господа нашего, Иисуса Христа, погребением и всесильным Его во ад с душею и Божеством сошествием, иже тамо силою своею Божественною тебе, во злобе сильнаго злоначальника, связа и силы твоя, твоея злобы, изпраздни, и души праведных, тамо связанных плени, и с Собою, яко силен в крепости, возведе. Убойся сего, вечнаго Божия гнева наследниче, и скоро от создания сего отъиди!
Заклинаю тя, крамольниче наветливый, смертию смерть поправшим и твою мучительскую державу разрушившим, преславно же из мертвых силою своего Божества самовластно воскресшим, Господем нашим, Иисус Христом. Убойся крепкаго победоносца, Божий сопротивниче и погибельный сосуде, и стрепетно вскочи, устранися!
|
|
|
Заклинаю тя, клятвы осуждения наследниче, по воскресении своем апостолом своим преславно плотию явившимся и мир свой тем, и власть свою на прогнание тебе давшим, и с ними рыбы печеной и от пчел сот ядшим, и Фому прикосновением своих ребр пречистых, ручных же и ножных язв уверившим и четыредесять дней на земли пребывшим. Убойся сего, вечныя муки повинниче, скоро изыди и далече отскочи от создания сего!
Заклинаю тя, мерзкий и всякия нечистоты исполненный душе, плотию вознесшимся на небеса Господем нашим Иисус Христом, со славою одесную отца седящим и, скончавшимся днем Пятьдесятницы, по своему неложному обещанию Духа Святаго, от Отца исходящаго, на своя апостолы во огненных языцех ниспославшим, и тем благоразумием тем же весь мир просветившим, и от идолослужения к себе обратившим, тебе же и твою лесть испразднившим. Убойся, всякой злобы неистощимая пучино, вострепещи, убойся, отбежи!
Заклинаю тя, напрасный, свирепый и напущенный душе, паки со славою многою на облацех грядущим судити живых и мертвых великим Богом и Спасителем нашим, Иисус Христом, тебе же и всю споспешную, злобную силу вечному огню в нескончаемую муку предати хотящим. Убойся сего, дух хищный, зверю, огня же геенскаго и муки вечныя виновниче! Изыди, что медлиши? небесныя брани побежденный начальниче! Отступи, Божий отступниче! Устранися, Богом побежденный хульниче! Бежи, Христом испражненный и попранный, враждоначальниче!
Бог, сильный в крепости и крепкий в силе, страшный в бранех и дивный в чудесех, – Той тебе, милости недостойному, всякия неправды исполненному и светоносия лишенному прелестнику, крепко и грозно мною, рабом своим (имя) повелевает отъити от создания сего в пустая и безводная места, идеже ниже человек, ниже зверь обитает, и ктому во веки не возвратитися к нему, яко сила и держава, царство, слава Христа Бога нашего с безначальным его Отцем и пресвятым, и благим, и животворящим его Духом ныне и присно, и во веки веков. Аминь".
|
|
|
