 |
Коли бы хто своим ставомъ инший ставъ або сеножати затопил або греблю к чужому берегу присыпал.
|
|
|
|
Тежъ уставуемъ: коли бы хто у своей дедизне всю суполную реку мелъ, то естъ обадва бы береги его были, а на ней ставы и млыны поставил, а суседние вышние млыны своим ставом затопил, такъ ижбы ув ынших вышъших млынех за подвышеньем воды в нижнем ставе мливо быти не могло, албо если бы сеножати затопил без воли того пана, чые сеножати сут[ь], а онъ бы за то отмены взяти не хотел, к тому, если бы теж хто половицу реки, то есть одинъ берегъ маючы, а присыпалъ греблю к берегу другому чужому або што кгрунту, сеножати чужое водою занялъ и затопилъ, албо шкодливе подъмочылъ, такъ ижъбы хто пожытку звыклого слушного, який передъ тымъ мевалъ с того кгрунту своего, мети не могъ. А то бы учынилъ своволне без дозволенья того, чый другий берегъ тое рекл або чый кгрунтъ затопилъ, або шкодливе подъмочыл, тогды таковый укрывжоный, обведшы и оказавшы то возному и стороне, маеть того суседа своего первей в томъ листомъ упоминальнымъ черезъ возного напоменутъ, абы воды знижылъ и греблю новоприсыпаную от чужого берега откопалъ. А если бы того за упомненьемъ такимъ не вделалъ, ино укривжоный о то до суду земского маеть позвати. А врядъ земский на осуженье и на сконьченье таковую справу на судъ подъкоморого отослати маеть. А передъ подкоморымъ покажетъ ли се то явне с права, же в которой с тыхъ речей кривда се ему дееть, тогды подкоморый маеть на той противной стороне ему дванадъцать рублевъ грошей кгвалту и к тому шкоды, што бы ихъ затымъ у замешканье млива або в неужыванью кгрунту своего затопленого подънялъ, за доводомъ слушнымъ сказати. А такового ставу, где хто оба береги свои маючы, воду ку шкоде млива суседнего подвышилъ або чужого кгрунту залилъ або подъмочылъ, воду спустити и знижыти такъ, яко бы и мливу верхнего ставу ничого не шкодило, и кгрунтовъ, сеножатей чужыхъ не заливало и шкодливе не подъмочывало. А тую греблю, которая бы присыпана была к чужому берегу, жебы роскопалъ и воду выпустилъ такъ, яко бы чужого кгрунту греблею не дотыкалъся и водою его не заливалъ. Вед же хто бы черезъ давность земскую десеть летъ о подтопленье млына своего, о присыпан[ь]е к своему берегу гребъли и о залитье кгрунтовъ молчалъ и правомъ о то с противною стороною не поступовал, тогды вжо таковый о то вечне молчати мает.
|
|
|
Артыкулъ 22.
Хто на чыей земли посеетъ збожье, якъ маеть заповедати возьнымъ, абы не звозилъ до права.
Уставуемъ: хто бы на чыей земли збожъе якое кольвекъ без ведомости оного, чый кгрунтъ, посеялъ, тогды тотъ, хто своею землею быти менуеть, маеть взяти листъ заповедный от вряду земского або кгродъского того повету, в которомъ тотъ кгрунтъ лежыть, и тымъ листомъ врядовымъ через возного и двух чоловековъ сторонъны [так!] якого колвекъ стану маеть заповедати тое збоже самому тому пану або его вряднику, хто будеть самъ або его подъданый посеялъ. А если бы самого пана або врядника возный в дому не засталъ, або се указати не хотелъ, тогды покладаючы копею с того листу заповедного на именью тымъ обычаемъ, яко о покладанью листовъ упоминальных естъ доложоно. А в томъ листе заповедномъ, написавшы тую землю, где збоже засеяно меновите и достаточне, яко где лежыть, маеть быти доложоно подъ закладомъ на врядъ и сторону дванадцатма рублями грошей, абы тотъ, хто сеялъ, того збож[ь]я с того кгрунъту не звозилъ, але пожавъши его перед возным и людми сторонъными, на то от стороны жалобное послаными, и за ведомостью а поличеньем того возного и стороны поставил на той же земли до права и опатрил то добрым зложеньем и огороженьемъ, яко бы в нем до росправы шкода не сталася. И по той заповеди сторона жалобная мает сторону свою противную надале[й] за шесть недел[ь] позвы подкоморого ку росправе о тую землю позвати. А где бы зъ якихъ припалыхъ слушных правныхъ причын в шести неделях по заповеди позвати не могъ, тогды еще ему часъ позыванья заставити маеть и через другую шесть недель. И если бы тотъ, хто заповедалъ передъ подкоморымъ албо коморъникомъ, довелъ того правомъ, што жъ оный противникъ его тое збоже будеть посеялъ на его властной земли, тогды маеть ему быти яко земля, такъ и тое збожье и к тому кгвалту дванадцать рублевъ грошей сказано. А где бы тое збожье заповедное погнило або потравълено, тогды то ему противная сторона водлугъ статуту заплатити повинна будеть. Если жъ бы хто черезъ заповедь права не дождавшы, оное збоже пожалъшы, с тое земли прочъ звез, тогды маеть того закладу половицу стороне противной шесть рублевъ, а другое половицы три рубли грошей подкоморому, а другие три рубли грошей вряду тому, от которого листъ заповедный выйдеть, заплатити, которую заруку за отосланьемъ подъкоморого врядъ стороне, подъкоморому и собе справити на именью того винъного маеть, а збоже стороне з навезкою отдати або водлугъ статуту заплатити виненъ будеть. А будет ли хто на своей власной земли сеяти, а другий ему то заповедавшы, а того бы правомъ не довелъ, ижъбы его земъля была, таковый самъ маеть тотъ закладъ вряду и стороне платити, а кгрунтъ и збоже пры томъ, хто сеялъ, маеть зостати. А хотя бы збожъе погнило або стравлено было, того вжо онъ на противной стороне пойскивати не маеть, кгды жъ, яко вышей доложоно, онъ то мелъ опатрити, яко бы с тое меры шкода збожъю не была. Если бы се тежъ то трафило, жебы такое збоже пенъное, на поли зложоное, до росправы судовное с поля покрадено, ино застанет ли при кгрунъте тотъ, хто сеял, тогды ему тое жыто оный, хто прожно заповедалъ, виненъ заплатити, а собе в той шкоде винного искати. Зостанет ли пакъ с права при кгрунте тот, хто заповедалъ, тогды онъ, хто сеялъ, маеть ему тое збожье заплатити, а собе винъного в томъ исъкати. Такая жъ се заповедь и росправа маеть точыть и о сеножатяхъ пенъныхъ. Пакли ж бы хто черезъ дванадцать недель по заповеди стороны своее противное в такой речы передъ подъкоморого не позвалъ, тогды тому, хто сеялъ, волно будеть збоже або сено свое побрати. А будет ли в томъ часе покрадено, тогды тое шкоды на стороне противной искати. А тому, хто заповедалъ, вжо толко о кгрунтъ волно будеть и по оныхъ дванадцати неделяхъ правомъ чынити передъ судомъ належнымъ водлугъ порядку, въ артыкулехъ инъшыхъ сего жъ розделу, вышей описаныхъ. А на пенной земли нихто кгвалтовне не маеть збожья топътати и псовати, але се в томъ правне обыходить мають, яко вышей описано подъ зарукою вряду и стороне, вышей в семъ арътыкуле помененою.
|
|
|
|
|
|
Артыкулъ 23.
Хто бы земли в держанью былъ, а другий, правомъ не переперъшы, жыто пожало [так!] або жатое побралъ, або бой учынил, або соху зрубалъ.
Теж уставуем, иж коли бы хто которую землю держал у спокойном держанью, а с покоем сеял або о[р]ал, а другий, пришедши на тое поле, жито пожал або жатое побрал, або побил, потопътал, а вдарил самого або ч[е]л[о]в[е]ка его або которого колвекъ стану, або соху, колеса, борону зрубал и сошники взял, таковый мает платити кгвалтъ дванадцат рублев грошей. А если возмет без бою, тот мает шкоду заплатити з навезкою: коня - конем, а вола - волом навезати, а за соху десет грошей, а за нароги дванадцат грошей, за колеса дванадцат грошей, за борону шесть грошей заплатити. А потом, коли похочет, держачого о тую землю мает правом водле права спирати. А если бы хто в кого кгрунтъ отнималъ, а другий того боронил и в держанье не дал, тому мает быти право у суду належного. И хто в земли будет винен, тот мает шкоды и кгвалтъ оправити, яко коло того вышей описано.
Артыкулъ 24.
О увязан[ь]е в ымен[ь]е за долгъ або за инъшую причину, яко се мають справоват[ь].
Уставуем: если бы от насъ, г[о]с[по]д[а]ра, был послан дворанин нашь увязыватисе в чые именье за суму п[е]н[е]зей, которая бы прислушала до скарбу нашого, тогды тот посланец мает приехати до того именья и, вземши з уряду земского або замкового возного и людей добрых, шляхту, оного именья люди вси и их маетности списати и один реестръ дати до скарбу нашого, а другий до замку або до суду земского, а третий мает у себе зоставити для того, абы в час помовки мел чым се выправити. Также и для того, жебы потом с тым же тое именье, с чым взято, по заплате п[е]н[е]зей тому, чые будет, привернено было. Нижли где быхмо мы, г[о]с[по]д[а]рь, часу росправы перед нами сторон въ якой справе, суду нашому водлугъ сего статуту належачой, што на комъ сказали, тогды в такой речы маемъ отсылати через листы нашы на отправу до вряду земъского або кгродъского в томъ повете, где виноватого оселость лежыть и которому суду тая отправа належати будеть. А врядъ, до которого отошлемъ, винен будеть отправу чынити водлугъ того, яко о отправахъ речей сужоныхъ в розделе четвертомъ естъ доложоно, без жадное проволоки, але отъ принесен[ь]я до враду листу нашого отосланого надалей за чотыри недели, звлаща, где бы роки заплате пенезей, водлугъ статуту зложоные, не зашли. А будут ли роки положоны, ино по выстью роковъ тому досытъ учынити, тежъ надалей до чотырох недель.
|
|
|
Артыкулъ 25.
О именье, которое, зволивъшыся, дадуть до рукъ нашыхъ, г[о]с[по]д[а]ръскихъ.
Тежъ уставуемъ, ижъ коли бы обедве стороне зволивъшися и дали именье в руки нашы, г[о]с[по]д[а]рские, до росправы, а мы быхмо которому вряднику нашому або черезъ листы нашы, або черезъ увязчого оное именье до воли и науки нашое в держанье дали, тогъды врядникъ нашъ воленъ будеть в томъ именью слушную живность собе мети, а з двора ничого не маеть возити, але будет повиненъ оное именье со всими речми рухомыми, такъ тежъ и з доходы, часу д[е]ръжанья своего собраными, оной стороне, которо [так!] прыслушаеть, верне а зуполне за листомъ нашымъ, г[о]с[по]д[а]ръскимъ, отдати и дозрети того, жебы в ономъ именью за деръжанья его жадная шкода и спустошенье не сталосе. А если бы тотъ врядникъ иначей вчынилъ, повиненъ будеть оной стороне шкодной всю шкоду и згубу платити, а мы и потомки нашы винни будем с нимъ той стороне справедливость за позвы вчынити на першомъ року яко на завитомъ.
Артыкулъ 26.
|
|
|
