 |
О тэстаментъ на речы рухомые и на именья набытые, яко мають быти справованы.
|
|
|
|
Уставуемъ: коли бы хто на речы свои, маетност[ь] рухомую и тежъ на именья, всякимъ способомъ набытые, хотелъ тестамент чынити, тогды кождый таковый, будучы здоровый албо и хорый, толко бы при добрей памети и здоровый на розуме былъ, волно ему будетъ речы свои, маетность рухомую, также и именья, черезъ него самого набытые, однакъ же не отчызные, ани материстые имен[ь]я, кому хотечы подлугъ доброе воли своее, такъ духовнымъ особамъ, яко тежъ и светъскимъ, записати. Ведъ же при справованью тестаменту маетъ мети врадъ нашъ земъский албо кгродъский оного повету, где ся тотъ тестаментъ справовати будетъ. А где бы вряду такъ земъского, яко и кгродъского зуполъного к собе взяти не могъ, тогды хотя одна особа урядовая прибудетъ, маючы при враднику двухъ шляхтичовъ. А не можетъ ли быти и одинъ который урядникъ, тогды передъ трема шляхтичами, в томъ панъстве нашо[м], великомъ князстве литовъскомъ, оселыми людми, веры годными, можетъ тесътаментъ справити. А кгды сама тая особа, хто тестаменътомъ кому што записалъ, потомъ умеръ и тымъ вжо остаточную волю свою потвердитъ, приложивъшы до того тестаменъту печать свою. А если бы хто умел и могъ еще писати, тогды руку свою подъписати маетъ. Также и печатники, хто з нихъ писать умети будетъ, маютъ руки свои у тестаменту подъписать. Вед же подъписъ рукъ не маетъ быть на кустодеи, одно на самомъ тестаменте або на листехъ всякихъ записныхъ, и тыхъ особъ, звышъ предъречоныхъ, повиненъ будетъ о приложенье печати ихъ до того тестаменту своего просити. Тогъды тотъ тэстаментъ, тымъ обычаемъ справленый, вечными часы на всякомъ враде при зуполной моцы держанъ и ни в чомъ нарушонъ не маетъ быти. А тотъ, хто тестаментомъ своимъ што кому записовати будетъ, маетъ кождую речъ меновите докладати, и тые печатники, которые пры справованью тэстаменътовъ бывають, маютъ то, што слышали от того, хто тэстаментъ чынитъ, правдиве подъ сумненьемъ своимъ достаточне до тестаменту уси слова уписати и выразити безъ кождого охиленья значне. Вед же скоро по смерти его заразомъ неомешкане тотъ тестаментъ первей на враде кгродъскомъ, а потомъ передъ нами, г[о]с[по]д[а]ремъ, або передъ судомъ нашымъ земъскимъ на першыхъ рокохъ маетъ быти оповеданъ и до книгъ вписанъ. А где бы хто по написанью того тестаменту жыв зосталъ, волно ему будетъ завжды тестаментъ свой одменити колко кроть похочет. А остаточный всихъ першыхъ тестаментовъ, смертью его потвержоный и тымъ обычаемъ, яко вышей описано, справленый, у кождого права маетъ при моцы зостати.
|
|
|
Артыкулъ 3.
О вольность записать на костелъ именей набытыхъ.
Хочемъ такъ мети вечъными часы и уставуемъ: хто бы кольвекъ с подданыхъ нашыхъ хотелъ именье свое набытое на костел хрестиянъский записати, тогды волно будеть то ему учинити поступкомъ, вышей въ арт[ы]куле второмъ сего розделу описаным. Ведъ же предъсе с такого именья, на костелъ записаного, духовъные мають и повинъни будуть служъбу нашу земъскую военную конъно, збройно водлугъ уставы и уфалы земъское по тому жъ заровно из ыншою шляхтою служити, выправуечи на местъце свое слугу своего народу шляхетъского с такъ много почту, колко повиненъ будеть з оного именья ставить. И тотъ почетъ маеть быти подъ справою хоружого оного повету, где тое именье лежати будеть.
Артыкулъ 4.
Естли бы ся кому прыдало на войне, албо где в дорозе, або тежъ в чужой земли тестаменътъ чинити.
Уставуем теж: если бы ся пригодило кому тестаменътъ чинити на войне або где в дорозе, а не могъ бы трехъ светковъ мети, тогды предъсе колко ихъ мети можеть, принамъней двухъ особъ, только бъ людей добрыхъ, шляхтичовъ, веры годныхъ, при таковыхъ можеть тестаменътъ чинити. А по вчиненью маеть тотъ тестаменътъ объявленъ быти передъ нами, г[о]с[по]д[а]ремъ, або передъ судомъ земъскимъ на першыхъ рокохъ судовых, або перед кгродским на першихъ рочкохъ, а на войне передъ гетманомъ або хоружимъ поветовымъ, пры которомъ оповеданьи такового тестаменъту тые светки мають прысегою своею потверъдити. А где бы се трафило кому, будучы в чужой земли, тестаменътъ чинити, тогды тотъ тестаментъ маеть быти объявленъ перед тым врядомъ, где ся то прыгодить. А потомъ, прыехавшы зась до того паньства и повету, где прыслухати будеть, указавшы выписъ оного уряду, пры которомъ тотъ тестаментъ чиненъ, предъсе маеть передъ урядомъ земъскимъ того повету своего то оповедати, яко о томъ естъ вышей описано. А предъсе жъ тотъ, кому што за такимъ тестаменътомъ, в чужой земли справленымъ, посегнути належить, на томъ присегнути маеть, ижъ справедливе, за волею и ведомостью, за доброе и здоровое памети самое особы тое тотъ тестаменътъ справленъ.
|
|
|
Артыкулъ 5.
Которые печатниками и светками пры чиненью тестаменту быти не могуть.
Тежъ уставуемъ, ижъ при справованью тестаменъту печатъниками и светками быти не могуть тые особы, нижей назначоные, то естъ напервей [в оригинале: «напервем»] которые своихъ тэстаментовъ чинити не годни; второе, невесты; третее, екъзекуторове або опекунове того тестаменъту; четвертое, тежъ и тые быти не могут, которымъ в томъ тестаменте што будеть описано.
Артыкулъ 6.
С которыхъ причынъ тестаментъ за моцный у права приймованъ быти не маеть.
Коли бы в которомъ тестаменъте на дате або на местъцу якомъ значномъ поправовано и скробано ку шкоде которой стороне, таковый артыкулъ в томъ тестаменте за моцный у права не маеть быти приймованъ. А вшак же где бы на местъцу мало потребномъ, не в дате ани стороне ку шкоде былъ скробаный або поправованый, што бы се стало з омылки того, хто писалъ, тымъ того аръты[ку]лу в томъ тестаменте касовать не можеть. А хто бы хотелъ бурыти тестаментъ, и если бы в одномъ албо в колку артыкулехъ, надъ право описаныхъ, былъ нарушонъ, а вси иные водлугъ права справлены, тогды однымъ албо колькома арътыкуловъ всего тестаменъту касовати не можетъ. Так же и о записехъ всякихъ на каждую речъ розумено и сужоно быти маетъ.
|
|
|
Артыкулъ 7.
Причыны, для которых отецъ сыновъ або дочокъ выреч[ы]се можеть.
Уставуемъ, ижъ отецъ и матка выречисе сына и девки можетъ с прычынъ тыхъ, нижей описаныхъ. Перъшая: если бы сынъ або девъка, не помнечы на пана бога и на родичы свои, торъгнулъся рукою, ударылъ або пхнулъ з гневу, такового не только выречысе можетъ, але горломъ от ураду за жалобою и доводомъ родичовъ каран быти маетъ. Другая: коли бы сынъ або девъка значную кривду родичомъ чинили в забиранью маетности без воли и ведомости ихъ. Третяя: естли бы сынъ або девка зе злости своее а не для пожытку речы посполитое, фолъдровали на родичовъ своих на горло кому кгволи. Четвертая: если бы ся трафило где у права ойца [так!] або матки ручыть не хотели ку постановенью, а звлаща, где бы того врадъ допустилъ. Пятая: если бы девъка, нестатечне чыстость свою на вшетеченьство оборочаючы, мешкала. Шостая: если бы родичовъ опустили в зошлыхъ и старыхъ летех ихъ, а не давали жывности и инъшыхъ потребъ родичомъ. Семая: кгды бы родичовъ з рукъ неприятельскихъ окупить або вызволить не хотели, а маетности отцовъское або матъчыное ужывали. Што усе если бы ся явне и правне передъ урадомъ показало, с такихъ причынъ родичы могутъ детей своих выречися.
Артыкулъ 8.
|
|
|
