 |
Естли бы которая вдова замужъ пошла.
|
|
|
|
Уставуемъ тежъ: естли бы которая вдова замужъ пошла, а напервей, будучы за перъвшымъ мужомъ своимъ, вено, оправленое от мужа своего, мела, тогды вжо от другого мужа не маеть вена записаного мети. Нижли естли бы тотъ другий мужъ ее умеръ, а дети по собе зоставилъ, тогды она межы детми своими ровъную часть въ именью взяти маеть, а на томъ до живота мешкати. А естли бы одно дитя зостало, тогды от того дитяти албо от ближнихъ маеть на въдов[ь]емъ столцу толко на третей части зостати, а по животе и тая третяя часть маеть спасти на близскихъ. А ведъ же, седечы на вдовъемъ столцу, не маеть того именья утратити, але се во всемъ заховати водле того, яко вышей о томъ написано. Однако жъ тую волност[ь] мужу заховуемъ, ижъ волно ему будеть и такой жоне своей, вдовою понятой, што всхочеть маетъности своее лежачое и рухомое записати. А которой жоне што от мужа лежачого именья записано будеть, таковая вжо от детей, ани от близскихъ части, вышей споминаное, въ именью мужнемъ домагатися не мають.
Артыкулъ 17.
О именью, на которомъ мужъ жоне оправу учинить.
Тежъ уставуемъ, ижъ хто кольвекъ, описавши оправу жоне своей на которомъ именью своемъ, тотъ того именья своего никому иншому никоторымъ правомъ заводити не можеть, хотя бы и призволенье от жоны на писме мелъ и показывалъ, без очевистого передъ врядомъ сознанья ее. А и врядъ тежъ кождый на таковомъ венованомъ именью никому отправы никоторое за выступъ и вину мужа ее чинити не маеть, окромъ доброволного и очевистого передъ врядомъ самое панее венованое прызволенья. И к тому, где бы за выступъ який женний, зъ именья ее веновного вчыненый, што на ней самой за невчыненьемъ з нее через мужа справедливости с права сказано, тогды то на томъ же именью ее веновномъ отправовано быти маеть.
|
|
|
Артыкулъ 18.
О крывдахъ, которые ся деють от мужа з ымен[ь]я, веновного жоне.
Естли бы мужъ, записавши которое именье жоне своей у вене за внесенье ее ажъ по животе своемъ, а самъ бы с того именья кому якие кривды чинилъ, тогды в такихъ речахъ предъсе позвы мають быти покладаны на том же именью, с которого се крывды деють. И мужъ таковый виненъ будеть за тыми позвы до суду становитисе. А жона хотя бы позовъ с такого именья зносила и право свое веновное слушное оказывала, врядъ предъсе за тымъ позвомъ на мужа ее водлугъ права сказанье чинити будеть. А отправа за то на иншой оселости его, естли которую в том же або хотя в ыншомъ повете мети будеть, чинена быти маеть водлугъ науки сего статуту, вышей около отправъ описаное. А не будет ли болшей именей мети над тое, жоне венованое, тогды и на маетности его рухомой, естли которую вряду окажеть, а в недостатку маетности и на самой особе отправа чынена будеть.
Артыкулъ 19.
О бесплодъной жоне.
Кгды бы которая жона, будучи замужомъ, безъплодне умерла або хотя бы и плодъ мела, а тотъ бы плодъ первей ее смеръти або и по животе ее, летъ зуполныхъ не дошедши, зъ сего света зъшолъ, а она бы, маючи певное внесенье за выправою от родичовъ своихъ, а того бы внесенья никому не записала, таковое внесенье само безъ привенку засе в тот же домъ, с которого вышла, вернутисе маеть родичомъ ее, которые ее замужъ выправовали. А не будет ли родичовъ, ино братьи рожоной. А которая бы жона, безъплодне змершы або и плодъ мевшы, але живого его по собе не зоставившы, або бы тежъ тотъ ее плодъ по ее смерти, летъ не доросъши, змеръ, а она бы мела внесенье и выправу певную от братьи зъ четвертое части, а никому бы того не записала, а еще бы сестра ее была не выпосажона и замужъ не выдана, тогды такое внесенье ее не на братью, але на сестру, замужъ не выданую, приходити будет. Одно жъ естли бы оное внесенье сестры своее братья собе взяти хотели, тогды вместо того сестре невыданой зо всее четвертое части, чого стояти будеть посагъ, выправу дати повинъни. Кгды жъ четвертая часть водлугъ давныхъ правъ особливе на выправу девокъ замужъ отложона безъ всякое розьности, хотя бы ихъ было и наболей або тежъ и одна. А естли бы отецъ колко дочокъ за своего живота выдалъ, а еще бы одна або колько ихъ невыданыхъ зостало, тогды той албо тымъ позосталымъ не зо всее четвертое части, але водлугъ ихъ права и личъбы с части тое четвертое выправа дана быти маеть. Пакли ж бы сестры, не выданое замужъ, не было, тогды тое внесенье по безплодной сестре маеть прийти на братью и на ихъ дети, потомки. А где бы братьи и ихъ потомковъ не было, тогды тотъ спадокъ внесенья сестры безплодное змерълое на сестры иншые, хотя и выправеные, и на ихъ дети, потомки прыйдеть.
|
|
|
Артыкулъ 20.
О розводехъ малъженьских передъ судомъ духовнымъ.
Тежъ уставуемъ, ижъ розводъ малъженьский, кому бы до того спору и розницы приходило, маеть быти водлугъ права хрестияньского кождымъ особамъ нигде инде, одно передъ судомъ духовънымъ ихъ набоженьства. И естли мужъ зостанеть виненъ з розсудку права духовного, тогды жона зостанеть на оправе, от него описаной, яко вышей о томъ естъ постановлено. А пакли бы жона винъна найдена, тогды внесенье и оправу свою тратить. А ведъ же естли бы былъ розводъ за слушнымъ доводом для кревности, ижъ се малъженьство в неведомости кревности стало, албо для инъшых причын, которые бы ся передъ правомъ духовнымъ показали, ижъбы слушный розводъ мелъ быти, тогды пры розводе привенокъ при мужу, а внесенье при жоне зостати маеть. Але на росправу судовную межы такими розведеными около вена маеть судъ духовный, выписавъшы правдиве и верне причыну розводу, отослати ихъ до суду належъного светъского в томъ повете, где тое именье веновъное лежати будеть. А врядъ светъский розсудокъ свой о томъ промежку нихъ водлугъ науки сего статуту вделати, а потом и отправу водлугъ права учинити будеть повиненъ.
Артыкулъ 21.
О понятью в станъ малъженьский людей убогихъ.
|
|
|
Естли бы ся трафило, жебы убогий чоловекъ якого жъ кольвекъ стану, не маючи жадное маетности своее, понялъ бы жону, по которой бы тежъ ничого не взялъ, а потомъ бы се обадва посполу за помоч[ь]ю Божою доробили албо дослужили маетности доброе, а мужъ бы умеро [так!], не росправивъшы маетности записомъ або тестаментомъ, тогды жоне его зо всее маетности, по нем зосталое, маеть быти выделена третяя часть, а детемъ властнымъ, которые бы з мужомъ мела, две части. А естли бы детей не было, тогды пры всей маетности жона остати мает. А естли бы жона тая потомъ без потомства змерла, а никому того не записала, тогды по ее смерти тая маетность маеть спадати половица на кревныхъ оного мужа первшого, а половица на кревныхъ ее. То се тежъ маеть розумети и о такой жоне, естли бы первей мужа умеръла, ижъ по ее смерти маетность на мужа и детей ее приходити будеть и потомъ далей на близских водлугъ сего арътыкулу.
Артыкулъ 22.
Абы нихто повинъное собе ве крви не поймовалъ [в оригинале: “пойновалъ”].
Уставуемъ, хотечи то мети, абы подданые наши водле правъ Божихъ и хрестияньских жили в малъженъстве [в оригинале: “малъженустве”] светом, прото абы жаденъ не смелъ повинъное собе ве крви поймовати, ажъбы минуло чворо поколенье по собе идучое такъ зъ отца, яко и з матки, а рожоныхъ в тую личбу не личечы. Также абы не поймовали жонъ братьи своее не толко рожоное, але и стрыечное, также жонъ стрыевъ, вуевъ своихъ, ажъбы минуло трое поколене по собе, на долъ идучое, не кладучи в тую личбу рожоныхъ. А где бы хто понялъ ведоме, умысльне жону, ве крви собе повинную такъ по отцы, яко по матце, албо невестку, дядиную надъ замеренье и уставу, вышей описаную, таковый кождый, будучы о то позванъ до вряду нашого земъского, за слушнымъ доводомъ маетности своее лежачое, а где бы лежачое не было, ино рухомое половицу на реч посполитую и на насъ, г[о]с[по]д[а]ра, тратить, до столу нашого того панъства, великого князства литовъского. Также и жона тая, где бы, ведаючы о кревности, замужъ шла, внесенье свое тратит. А мела л[ь] бы свои властные именья, тогды и она половицу своихъ именей также на речъ посполитую до столу нашого тратить. А такое мальженъство предъсе маеть быти розлучоно. А на другой половицы именей своихъ мають зостати толко до жывотовъ своихъ, а по смерти ихъ тые дети, которые бы в такомъ малъженъстве, ве крви повинъности злучономъ, спложоны были, не толко до именей тыхъ ничого мети не будуть, але и сами за бенъкарты розумени быти мають. Одно жъ тые именья по смерти такихъ особъ спадуть на близъскихъ кождого з нихъ водлугъ линии рожаю. А надъ то такий мужъчизна до жадныхъ урядовъ припущонъ быти не маеть. А где бы се трафило, хто бы мелъ с першою жоною дети, не противку тому праву понятую, або унуки, а понял бы другую жону, ве крви собе повинъную, такий заразомъ за припозваньемъ до уряду земъского и показаньемъ того слушне жону тою [так!] маеть опустити и тратить росказованье свое на[д] именьями и маетъностью своею. А сынове або унуки, або кому бы се то по смерти его мело достати, заразомъ при его жывоте мають в моцъ оные добра взяти. А жоны такое именье такежъ мають до рукъ своихъ взяти албо дети ее, естли бы мела с першымъ мужомъ набытые, албо где бы детей не было, ино близьские кревные. А самыхъ мають ховати до смерти ихъ, даючы имъ одежу и живность пристойную водлугъ стану и можности именья. А естли бы тотъ дети сплодилъ с таковою повинъною, не за добрые мають быти розумени, але за бенъкаръты. Пакли ж бы тые особы, в кревности такой до стану малженъского злучоные, давали о собе справу, же бы се то мело стати в неведомости ихъ о той кревности, тогды таковые винъни будуть кождый з нихъ самовторъ с прыятелми, собе повинъными, прысегнути на томъ, ижъ в тое малъженъство вступили, не ведаючи о кревности межи собою. А по такой присязе яко именей и маетности своее тратити не будуть, такъ и дети, в томъ малженъстве спложоные, за дети учъстивого ложа розумени будуть и от именей по смерти такихъ родичовъ отдалены не мають быти. Але сами тые малжонъкове предъсе розълучоны будуть, а то, естли имъ по той такой розлуце волно будеть в ыншое малъженъство отдаватисе, розсудокъ права духовного промежку ихъ узнати маеть. Также естли бы се показало за припозванъемъ до суду кгродского, ижбы хто, жону свою венчальную живую маючи, другую понялъ, тотъ ничымъ инымъ, одно горломъ маеть быти каранъ. А также и жона таковая, естли бы, ведаючы о другой жоне его жывой, замужъ за него пошла, таковому жъ каранью подлегають.
|
|
|
|
|
|
