 |
О отънятью именья або людей, кгрунътовъ по увязанью врядовомъ.
|
|
|
|
Еще тежъ и то опатруемъ, ижъ где бы хто, поступившы увязанья в ыменье, в люди и який колвекъ кгрунътъ, будь возному, от вряду которого посланому, або самому уряду, и вжо бы то стороне поводовой в деръжанье врядовне подано, а потомъ бы онъ самъ або черезъ врядника, слугъ, бояръ, подъданых своих и через кого кольвекъ иного то, во што было сторону жалобную увязано, кгвалътовне и безъправнЪ отнялъ, тогды стороне, в томъ укривжоной, хотя жъ будеть увязанье дошло от вряду земского, але похочет ли для прудшое справедливости до кгроду о то такового противного позвати ало тежъ всхочет ли до суду земъского позвати, то.обое волно ей будеть учинити. А в речи такой, где было увязанья от кгроду, то засе до кгроду маеть позвати. А за которимъ колвекъ позваньемъ такъ до земства або до кгроду маеть быти рокъ завитый. И тамъ, на вряде, доведет ли сторона жалобная увязанья своего врядовного, в которое будеть черезъ возного або черезъ самый урядъ вошла, и отнятья кгвалътовного черезъ сторону ее противную тое речы, во што было увязано, тогды таковый спротивникъ еще совито такъ великую суму и заклады, за якую жалобникъ былъ увязанъ, той то стороне своей жалобной и к тому кгвалъту двадъцать копъ грошей ему жъ заплатити будеть повинен. И за то все увязанье и отправа на именью такого спротивъного заразомъ по суде безъ складанья жадныхъ роковъ учинена быти мает водлугъ того жъ порядъку и науки сего статуту, около увязан[ь]я вышей описаное.
Артыкулъ 101.
О бранью винъ черезъ вряды нашы, в семъ статуте и на записехъ добровольныхъ на вряды описаныхъ.
Кгды бы хто попалъ у вину якую, слушне правомъ переконаную которому вряду нашому земъскому або кгродскому, такъ в семъ статуте, яко и в записехъ добровольныхъ описаную, тогды такие вины мають належати у суду земъского всимъ трем урядникомъ земским — судьи, подъсудъко [так!] и писару — на ровные части. А въ кгродъского суду, где бы ся то не передъ самыми воеводами або старостами судовыми точыло, по тому жъ всимъ тремъ врядникомъ — наместънику або подстаростему, судьи и тежъ писару. Ведь же кождый врядъ нашъ водля доброго уваженья и хрестияньского поступку прихильнейшым маеть быти до отпущенья таких винъ, нижли до бранья ихъ, звлаща сиротам, убогимъ, а не свовольнымъ фолькга в томъ чынена быти мает.
|
|
|
Артыкулъ 102.
О позыванью через самыхъ пановъ о крывъды ихъ слугъ, бояръ и подъданыхъ.
Кгды ся чыему слузе, боярыну, подданому и якого кольвекъ стану челяднику станеть якая крывъда от кого кольвекъ, буд[ь] от самое особы стану шляхетъского и иншое якое албо от чыих слугъ, врядникъ, бояръ и подданыхъ, и естли бы се то суседъским обычаемъ, не допущаючы того до нашого г[о]с[по]д[а]ръского вряду, росправити и успокоити не могло, а прышло бы до листовъ упоминальных албо и до позвовъ, тогды такъ листы упоминальные, яко и позвы мають быти браны не именемъ слугъ, бояръ албо людей чыих укрывъжоныхъ, але именем и на жалобу самыхъ панов, доводечы имъ справедливости. Ведъ же часу права могуть то панове отправовати через умоцованых своихъ, и не сам панъ, звлаща где не о его речъ властную або шкоду идеть, але тые укрывжоные слуги, бояре и подъданые его кгвалтовъ, кривдъ и шкодъ своихъ водлугъ права доводити могуть. Ведъ же на кгвалтех толко людямъ народу шляхетъского присега всказована быти маеть.
Артыкулъ 103.
Яко писаръ в писанью справъ судовыхъ заховатися маеть.
В писанью писари и подъписки писанья такъ широкого не мають чинити, вписуючы позвы и справы, которые ся передъ тым точили в той справе, але речъ достаточне выписати с таковыхъ его листовъ, даты позвовъ и листовъ поменяючи, то, што ся будеть стегати до тое справы, которая ся передъ судъ приточила. И такъ мають сторонамъ выдавати, абы продолъженьемъ писанья отправы людъские не затруднялися. Ведъ же виненъ всего доложити, яко сторона потребовати будеть, чого собе сама сторона або прокураторъ его жъ маеть припилновати, даючи мовенье свое зъ обу сторонъ на писме до писара надалей до третего дня для памети врядови, абы згажалъ вряд с паметью своею, што ся передъ нимъ точило. А не далъ ли бы до третего дня, тогды врядъ вжо не повиненъ приймовати. А где бы сторона потребовала якого листу, абы былъ вписованъ до книгъ для старости и для чого жъ кольвекъ, албо естли бы хто кому, даючи на вечность якую и на што колвекъ записы свои властъные водлугъ давного звычаю, и сознавалъ бы ихъ передъ врядомъ, тогды писаръ, не чинечы широкое предъмовы, але толко особъ тых поменивши, хто кому што записуеть, а потом листъ албо записъ тотъ слово от слова до книгъ вписати маеть.
|
|
|
Артыкулъ 104.
О возномъ, которого по латине зовуть енералъ.
Бачечы мы, г[о]с[по]д[а]ръ, ижъ того естъ потреба для многих потребъ и справъ людъскихъ, уставуемъ, ижъ в кождомъ воеводъстве и повете в здешнемъ панстве нашомъ, великомъ князстве литовъскомъ, надъ иншые одинъ возный установленъ быти маеть, таковый, которого латиньскимъ езыкомъ зовуть енералъ. А таковый врядъ в томъ воеводъстве и повете оселому родичу великого князства, писмо руское умеючому, за прычиною и ознайменьемъ о немъ намъ, г[о]с[по]д[а]ру, от воеводъ, старостъ судовыхъ и шляхъты, обывателевъ тыхъ поветовъ, откуль тотъ будеть. А мы, г[о]с[по]д[а]ръ, листы с канъцляреи нашое на таковые вряды имъ давати маемъ, которые после данины нашое, г[о]с[по]д[а]ръское, на вряде томъ, в которомъ повете таковая особа оселая будеть, на перъвшыхъ рокохъ судовыхъ земъскихъ передъ урядомъ при бытности шляхъты прысегу на врядъ свой ротою иньшыхъ возных учинити маеть. А по таковой присязе вжо урядомъ своимъ справовати будеть таковымъ способомъ, то естъ таковый возный в кождое воеводство и поветъ по всей земли того паньства нашого, великого князьства литовъского, где кому одно потреба будеть, позвы носити и врядомъ своимъ возновъскимъ владати и шафовати моцъ мети будеть. А при каждой справе сторону шляхту пры собе мети маеть, яко о возныхъ естъ в том статуте описано. А сознанье того кождого возного в кождомъ повете и на кождомъ урядЪ за моцное и важное прыймовано быти маеть. А в земли Жомоитъской и два таковые енералы быти могуть.
|
|
|
Артыкулъ 105.
О потваръцохъ.
Забегаючы тому, абы люди злые от потварей на людей невинъных повъстягнены были, уставуемъ: естли бы хто, пробачившы боязни бозьское и въстыду людъского, речы якие змышленые потваръные до суду донесъ и справы тое на кого попиралъ, а то бы се на него первый разъ явными доводы и слушными знаки показало, тогды за то стороне той, которую спотварылъ, вины повиненъ будеть заплатити шесть копъ грошей. А покажет ли ся то вторый и третий разъ, тогды за кождымъ разомъ по тому жъ стороне противной платити повиненъ будеть. А естли бы и четверътый разъ тое жъ ся на того жъ от кого колвекъ показало, тогды вжо таковому ноздра розрезана быти маеть, и въжо таковый потомъ абы николи до жадного вряду и до справы прыпущонъ не былъ. Вед же ся то розумети маеть толко о явныхъ потваръцохъ, а не о тыхъ людехъ, которые або для убозства, або для якое простоты и неумеетности своее, албо теж для якого прыпадку права своего собе не доведеть, тые за потваръцы розумени и караны быти не могуть.
|
|
|
