О выконанью увязанья и отправы на именью виноватого въ иншых поветехъ, где бы оселости и инъшое маетности его в томъ повете, где сказнь вышла, стало.

Уставуемъ, ижъ кгды бы в которомъ повете на комъ с права такъ великая сума п[е]н[е]зей сказана была або бы хто, упоромъ своимъ противечися праву посполитому и увезанья не поступуючы, в заруки такъ великие попалъ, за што бы отправы водлугъ сего статуту именье и маетност[ь] его в томъ повете, в котором судъ был, не вынесла, а онъ бы еще мелъ оселость в ыншыхъ поветех, тогды за ознайменьемъ о томъ и отосланьемъ через листъ отвороный вряду того повету, где тая речъ сужона, маеть и повиненъ будеть врядъ другого повету, будь земский або кгродъский, которому з нихъ водле того суда належати будеть, то естъ естли у земъства было сужоно, тогды земский, а естли у кгроду, тогды тежъ кгродъский, за останокъ сумы, с права сказаное, водлугъ науки сего статуту, на именьяхъ виноватого отправу стороне поводовой учинити от принесенья имъ такого отосланого листу с того иншого повету надалей за чотыри недели подъ тою жъ виною, вышей въ арътыкуле деветьдесятъ четверътом сего жъ розделу описаною. Естли бы ся тежъ трафило отправу за суму п[е]н[е]зей чинити або в самое с права сказаное именье увязывати, в таковое, которое бы ся розлучило людьми або кгрунтами от двора того пана в ыншый прилеглый тому поветъ албо и колко поветовъ, тогды врядъ того повету первшого маеть ку отправе и увязанью до остатъка тую речъ отослати через листъ свой отвореный въ иншые поветы, где такие люди, кгрунты лежат, до суду кгродъского. А тотъ врядъ кгродъский повиненъ будет тое сказанье водлугъ листу судового оного первшого вряду, где ся початокъ тое справы сталъ, выконати и отправу учинити водлугъ порядъку статутового подъ виною, ув ыншихъ арътыкулехъ на врядъ о зволоку отправы описаною.

Артыкулъ 98.

Якимъ шацункомъ отправа сумы п[е]н[е]зей, с права сказаныхъ, на именью лежачомъ чинена быти маеть.

Уставуемъ, ижъ кождый врядъ нашъ судовый за суму п[е]н[е]зей присужоную маеть водле порядку сего статуту вышей мененого увезанье давати шацункомъ, в семъ арътыкуле нижей описанымъ, за кождую двадъцать копъ грошей — в службу або волоку, людми оселых, а за десеть копъ грошей — у полъслужбы або полволоки, людми жъ оселыхъ, по тому жъ и в землю пустовскую або волоку пустую — за десеть копъ грошей. А где бы людей тяглых и пустовщинъ не стало, тогды в бояре панцерные и путные: в панцеръного боярина зъ его землею — за сорокъ копъ грошей, в путного — за тридъцать коп грошей. А естли бы и тыхъ не стало, тогды в люди и кгрунты бояръ, шляхты, которые бы оселостями своими ку тому жъ именью, на которомъ отправа чинена будеть, належали, а не мели бы первей данинъ вызволенья от пана своего слушного водлугъ сего статуту. Однакъ жо тотъ, хто въ именья такие шляхетские увяжеться, не маеть у тое шляхъты именей отнимати, толко маеть смотрети службы и повинъности такое, якую повинъни были пану своему, также шацункомъ, вышей и нижей описанымъ. А моркгъ земли погною — за копу грошей; поля простого моркгъ — за пятьдесят грошей; сеножать моркгъ — пятьдесятъ грошей; земли лесное, которая бы се годила на пашню, моркгъ — за сорокъ грошей; бору, лесовъ, пущъ кождый моркгъ — по грошей двадъцати. Пакли жъ бы и таковых кгрунтов на увязанье за суму присужоную не доставало, тогды и в засеянье на кгрунтехъ дворъных жытомъ и ярынами увезанье давано быти маеть, то естъ с кождого моркгу, погною рахуючы: жыта по пети копъ, а на моркгу простого поля — по тры копы, а на моръкгу ярынами засеяными — пшеницы по шести копъ, ечменю по шести жъ копъ, овса по чотыры копы, ярыцы по тры копы, гречихи по пети коп, гороху по шести копъ, проса по чотыри копы, сочывицы по чотыри копы. А иншые огородные речы засеяные — водле уваженья возного и шляхты, з нимъ на томъ увязанью будучое.

А то маеть быти шацовано на п[е]н[е]зи по тому, яко нижей в семъ статуте шацунокъ збож[ъ]ю естъ описанъ. А што ся дотычеть озеръ, рекъ, тогды ув озера увязанье давано быти маеть ведле ведомости, от суседъ околичных осягненое, яко много тонь в которомъ озере будеть, каждую тоню становечы за двадъцать чотыри грошы; ставы и млыны, сажовки — подле важности пожитковъ, а на реках езъ або сежу осетровую — за копу грошей, езъ рыбий — за грошей дванадъцать, гать котцовый рыбий руский або полеский — за грошей дванадъцать, гать уюновый, также полеский,— за грошей шесть.

А где бы и тыми речми вышей меноваными сума сказаная не выполниласе, тогды быдло всякого рожаю, збожъе молочоное и немолочоное и иные статки и речи рухомые шацункомъ сего статуту [в оригинале: «ста статуту»] подавати маеть. А которымъ бы речамъ шацунокъ в статуте не былъ описанъ, тогды также возный з шляхтою водлугъ уваженья своего шацунокъ и отправу на тыхъ речахъ чинити мають. А пакли ж бы и то все оное сумы не выносило, тогды по таковой отправе возный з шляхтою, рокъ чотыри недели зложившы, и по выштью ихъ маеть и в дворъ, и в будованье дворное, и в пляць, ошацовавшы все будованъе, за што стояти будеть, увезати и стороне подати маеть. А возный тотъ и шляхта, которые таковую отправу делати будуть, тое именье, люди, статокъ ихъ робочый и вшелякую повинъность звыклую тыхъ бояръ, людей и пожытки списати мають и тотъ реестръ передъ урядомъ сознати. А тотъ, кому таковые добра подадут, ничого болшей надъ повинность, в реестре описаную, брати не мает под нагороженьемъ всего того стороне противной, што бы надъ то взялъ по выкупенью такового именья и людей. Естли ж бы и тое все оное сумы не выносило, тогды на особе самой в недостатку маетности отправа вчинена быти маеть. Ведъ же припозвавшы его до вряду кгродского, а то тымъ обычаемъ, ижъ тот позовъ маеть быть черезъ возного при костеле в парафеи и на торъгохъ прибитый и обволаный. А кгды станеть, тогды вряд кгродский оного повету за ознайменьем тое речи от стороны жалобное, а за сведецъством возного и стороны, ку той отправе посыланыхъ, маеть его до везенья осадити. А не станет ли за позвомъ, ино где бы колвекъ могъ быти постигненъ, маеть быти пойманъ через врядъ кгродский и до везенья замкового або дворного осажонъ, в которомъ везенью потуль маеть седети, покуль рукоемъство на томъ дасть, ижъ стороне своей за все досыть учынить. А не будет ли мети рукоемъства, тогды врядъ стороне поводовой винъного выдати маеть, а онъ его у везенью держати маеть, ажъ ему за всю суму присужоную досыть учинить. А хто бы такового врядовымъ посланъцомъ взяти боронилъ, таковый за припозваньемъ о то до кгроду жъ на рокъ завитый и за переконаньемъ его в томъ правнымъ доводомъ самъ будеть повиненъ жалобнику то платити, што былъ виненъ тотъ, кого не допустил поймати.

Артыкулъ 99.

О заплате сумы п[е]н[е]зей, с права сказаное.

Кгды бы хто, маючи на собе суму пенезей, с права сказаную, а не хотечы за нее допустити увязанья в ыменье свое, хотелъ ее стороне своей противной на рокъ заплатити албо и по въвязанью въ именье, в люди, кгрунъты хотелъ то, во што увязано, выкупити, тогды перъвей маеть сторону свою противную листомъ отворонымъ вряду земъского або кгродъского черезъ возного и двухъ шляхтичовъ обнести. Не трафит ли ся [в оригинале: «трафилится»] очевисте копЪю с того листу подати, ино ее на именью положити наближей передъ тым днемъ, которого бы хотелъ пенези отдати, за две недели, абы бранья пенезей пилна была. А где бы хто сам або черезъ кого колвекъ иного, корыстячы в держанью именья албо людей увязаныхъ, не хотелъ на тотъ день ознайменый п[е]н[е]зей присужоныхъ брати, а если еще до увязанья не пришло, ино на роки, от вряду назначоные, естли бы тежъ не хотелъ хто п[е]н[е]зей присужоныхъ приняти, с которыми будеть найдованъ в ыменью своемъ тежъ врядовне з вознымъ и стороною, тогды такового тот, хто п[е]н[е]зи отдаеть, маеть позвати ку бранью п[е]н[е]зей до вряду земского або кгродского на рокъ завитый, на которомъ року оный позваный, никоторыми причинами, хотя и правными, не вымовляючися, вынявшы толко то, где бы хто былъ за границою в чужих паньствахъ на послузе нашой и земъской, виненъ будеть стати и пенези свои присужоные приняти.

А то, во што былъ увязанъ, пустити. А естли еще до увязан[ь]я не пришло было, тогды его зъ отданья п[е]н[е]зей квитовати. Пакли жъ бы тотъ позваный самъ, ани черезъ кого иного перед урядом ку бранью пенезей не сталъ, тогды врядъ, передъ который будет позвано, маеть пенези при собе зоставити и за печатми всихъ трохъ врядниковъ судовыхъ при книгахъ мають быти хованы, а стороне з ыменья, з людей вывезанье дати. А тые пенези винен будеть врядъ тому, кому были присужоны, заразомъ, скоро се ихъ поменеть, безъ жадного затрудненья надалей за тыйдень от упомненья отдати подъ заплатою другое, так же вЪликое сумы. Где бы се о то з урядомъ до розъсудку правного за неотдан[ь]е пенезей прыточило, также хто бы за позычоные пенези увезавшысе в чые именье, а не хотелъ на рокъ, в записе помененый, пенезей приняти и именья поступити, о то жалобной стороне вольно будеть такового до которого похочеть уряду кгродъского або земъского на такий жо, яко вышей описано, рокъ завитый позвати, а отдавати таковые пенези нигде иньде, одно на врядех нашихъ судовыхъ.

Артыкулъ 100.