1. Соборное Уложение 1649 года (извлечения)

ГЛАВА I 

А В НЕЙ 9 СТАТЕЙ О БОГОХУЛНИКАХ И

ЦЕРКОВНЫХ МЯТЕЖНИКАХ

1. Будет кто иноверцы, какия ни буди веры, или и русской человек, возложит хулу на господа бога и спаса нашего Иисуса Христа, или на рождьшую его пречистую владычицу нашу богородицу и приснодеву Марию, или на честный крест, или на святых его угодников, и про то сыскивати всякими сыски накрепко. Да будет сыщется про то допряма, и того богохулника обличив, казнити, зжечь.

2. А будет какой бесчинник пришед в церковь божию во время святыя литургии[15], и каким ни буди обычаем, божественныя литургии совершити не даст, и его изымав и сыскав про него допряма, что он так учинит, казнити смертию безо всякия пощады.

3. А будет кто во время святыя литургии и в и(ы)ное церковное пение, вшед в церковь божию, учнет говорити непристойные речи патриарху, или митрополиту, или архиепископу и епископу, или архимариту, или игумену и священническому чину, и тем в церкви божественному пению учинит мятеж, а государю про то ведомо учинится и сыщется про то допряма, и тому бесчиннику за ту его вину учинити торговая казнь.

4. А будет кто, пришед в церковь божию, учнет бити кого ни буди, и убьет кого досмерти и того убойца по сыску самого казнити смертью же.

5. А будет ранит, а не досмерти убьет, и ему учинити торговая казнь без пощады, и вкинути в тюрму на месяц, да на нем же взяти раненому за увечье бесчестье вдвое.

7. А будет кого обесчестит словом, а не ударит, и его за бесчинъство посадити в тюрму на месяц. А кого он обесчестит, и тому доправить на нем бесчестье, чтобы на то смотря в церкви божии никакова бесчинъства не было.

ГЛАВА XII

О СУДЕ ПАТРИАРШИХ ПРИКАЗНЫХ, И ДВОРОВЫХ

ВСЯКИХ ЛЮДЕЙ, И КРЕСТЬЯН

а в ней 3 статьи

1. На патриарших приказных и на дворовых людей и на детей боярских и на крестьян и на всяких чинов лю­дей, которые живут в патриарших в домовых вотчинах, во всяких делех суд давати безсрочно на патриарше дво­ре, потому что при прежних государех и блаженные памяти при великом государе царе и великом князе Ми­хаиле Феодоровиче всеа Русии ни в которых приказех на них суда не давали, а судили их на патриарше дворе, что судные дела слушает и указывает патриарх.

2. А будет патриарши приказные люди в каком деле праваго обвинят, а виноватаго оправят по посулом или по дружбе, или по недружбе, и тем людем, кто будет обинен не по делу, на тех патриарших приказных людей бити челом государю, и по тому челобитью спорные дела ис патриарших приказов взносити к государю и ко всем бояром. Да будет сыщетца, что патриарши судьи кого обинят не по делу, и тем патриаршим судьям за их не­правду указ чинить против того же, как указано о госу­даревых судьях.

ГЛАВА XIII

О МОНАСТЫРСКОМ ПРИКАЗЕ

 а в ней 7 статей

1. На митрополитов, и на архиепископов, и еписко­пов, и на их приказных, и на дворовых людей, и на детей боярских, и на их крестьян, и на монастыри, на архимаритов, и игуменов, и на строителей, и на келарей, и на казначеев, и на рядовую братью, и на монастырских слуг, и на крестьян, и на попов, и на церковной причет, во всяких делех, по нынешнее государево уложение, суд даван в Приказе Болшаго Дворца.

А ныне государь царь и великий князь Алек­сей Михайлович всеа Русии, по челобитью столников, и стряпчих, и дворян московских, и городовых дворян, и детей боярских, и гостей, и гостиные, и суконные, и иных разных сотен и слобод и городо­вых торговых и посадских людей, указал Монастырско­му приказу быти особно, и на митрополитов, и на архие­пископов, и на епископов, и на их приказных и дворовых людей, и на детей боярских, и на их крестьян, и на мона­стыри, на архимаритов, и игуменов, и на строителей, и на келарей, и на казначеев, и на рядовую братью, и на монастырских слуг, и на крестьян, и на попов, и на цер­ковной причет, во всяких исцовых искех суд давати в Мо­настырском приказе.

ГЛАВА XVII

О ВОТЧИНАХ

а в ней 55 статей

42. Да в прошлых годех, со ста тридесять шестаго году, по указу, блаженныя памяти великаго государя царя и великаго князя Михаила Феодоровича всея Русии, писано в его государевых жаловалных вотчинных грамо­тах: вотчинником, которым по его государеву указу вот­чины даны за службы, что тем вотчинником и их детем, и внучатом, и правнучатом выслуженые вотчины вольно продать, и заложити, и в приданые, и в монастырь по душе дать. А кто будет роду его ту вотчину из монасты­ря похочет выкупить, и ему та вотчина выкупати по пре­жнему уложенью, как выкупали при прежних государех родовые и купленые вотчины. А будет у него роду не останется, или останется, а выкупати не похотят, и та вотчина из монастыря взяти на государя, а деньги в мо­настырь дать за нея из государевы казны, по уложенью, по полтине за четверть, а в монастырь та вотчина не крепка.

А ныне государь царь и великий князь Алексей Ми­хайлович всея Русии, советовав со отцем своим и богомолцем святейшим Иосифом патриархом Московским и всея Русии, и с митрополиты, и со архиепископы, и с епи­скопом, и со архимариты, и игумены, и со всем Освящен­ным собором, и говоря с своими государевыми бояры, и с околничими, и з думными людьми и с столники, и с стряпчими, и з дворяны московскими, и з городовыми дворяны и детми боярскими указал, и собором уложи­ли: впредь с нынешняго уложения патриарху, и митропо­литом, и архиепископом, и епископом, и в монастыри ни у кого родовых и выслуженых и купленых вотчин не покупати и в заклад не имати, и за собою не держати, и по душам в вечной поминок не имати никоторыми делы, и в Поместном приказе за патриархом, и за митрополиты, и за архиепископы, и епископы, и за монастыри таких вотчин не записывати, а вотчинником никому вотчин в монастыри не давати. А кто и напишет вотчину в мона­стырь в духовной, и тех вотчин в монастыри по духов­ным не давати, а дати в монастырь родителем их денги, чего та вотчина стоит, или что умеръшей вотчине цену напишет в духовной. А будет родители тоя вотчины себе взяти не похотят, и денег в монастырь не заплатят, и ту вотчину прикащиком продать сторонним людем, а деньги дать в монастырь по умершаго душе по духовной. А будет кто с сего уложения вотчину свою ро­довую, или выслуженую, или купленую продаст, или за­ложит, или по душе отдаст патриарху, или митрополиту, или архиепископу, или епископу, или в которой мона­стырь, и та вотчина взяти на государя безденежно, и от­дати в роздачю челобитчиком, кто о той вотчине учнет государю бити челом.

43. А будет кто вотчинник какова чину ни будь, или вдова постригутся, а за ними будут родовые, или выслу­женые, или купленые вотчины, и им тех вотчин в мо­настыри не отдавать, а самим теми вотчинами постригшися не владети, а отдати те родовые и выслуженые вотчины вотчинником по уложению, а вотчинником их за те вотчины кормити и одевати, и всяким покоем покоити до их смерти. А будет они учнут государю бити челом, что родители их взяв у них родовыя, или выслуженыя, или купленыя вотчины, их не кормят, и никакова покоя им от родителей их нет, и им те вотчины продать роди­телем же своим, или и на сторону. А будет у них будут купленыя вотчины, и им те свои вотчины вольно продать, или безденежно отдать, кому похотят. А постригшися, будучи в монастыре, за собою вотчин отнюд не держати.

Тихомиров М. Н., Епифанов П. П. Соборное Уложение 1649 года. –

М.: Изд-во Москов. ун-та, 1961. – С. 70-71, 169-170, 210-211